ईलाम , ७ वैशाख । माईजोगमाई गाउँपालिकाको केन्द्र नयाँबजारबाट करिब ५ किलोमिटर दूरीमा रहेको थुम्केरानी पछिल्ला वर्षहरूमा सूर्योदय र सूर्यास्त अवलोकनका लागि लोकप्रिय बन्दै गएको छ । इलाम सदरमुकामबाट नजिक पर्ने भएकाले पनि यो पर्यटकहरूको पहिलो रोजाइ बन्न थालेको हो ।
इलाम बजारबाट सोयाङ हुँदै नयाँबजारसम्म सवारी साधनमार्फत करिब एक घण्टामा पुग्न सकिन्छ भने नयाँबजारबाट करिब ३० मिनेटको पैदल यात्रापछि थुम्केरानी पुग्न सकिन्छ ।
समुद्री सतहबाट करिब २,४०० मिटर उचाइमा रहेको थुम्केरानीबाट घना जंगल, फराकिला फाँट, हिमश्रृङ्खलासँगै दुर्लभ वन्यजन्तु रेड पाण्डा को अवलोकनसमेत गर्न सक्ने स्थानीयको भनाइ छ ।
