काठमाडौं,४ जेठ । राष्ट्रिय प्रजातन्त्र पार्टीकी सांसद खुस्बु ओलीले वैदेशिक रोजगारीका नाममा भइरहेको मानव बेचबिखन र अवैध एजेन्ट नेटवर्कविरुद्ध कडा कारबाही गर्न सरकारसँग माग गर्नु भएको छ ।
सोमबार बसेको प्रतिनिधिसभाको बैठकमा बोल्दै उहाँले नेपाल सरकारले सन् २०१७ देखि नेपाली नागरिक, विशेषगरी महिलाहरूलाई घरेलु कामदारका रूपमा वैदेशिक रोजगारीमा जान प्रतिबन्ध लगाए पनि त्यसले समस्या समाधान गर्न नसकेको बताउनु भयो ।
उहाँले सरकारको उद्देश्य महिलाहरूलाई शोषण र हिंसाबाट जोगाउनु भए पनि प्रतिबन्धका बाबजुद घरेलु कामदारका रूपमा विदेश जाने क्रम नरोकिएको उल्लेख गर्नु भयो । उहाँका अनुसार नेपाली महिलाहरूलाई खाडी मुलुकसम्म पुर्याउन एजेन्टहरूले विभिन्न वैकल्पिक रुट प्रयोग गरिरहेका छन् ।
उहाँले भन्नुभयो,‘नेपाल सरकारले सन् २०१७ देखि नेपाली नागरिक, विशेषगरी महिलाहरूलाई घरेलु कामदारका रूपमा वैदेशिक रोजगारीमा जान प्रतिबन्ध लगायो । सरकारको तर्क थियो । उहाँहरूलाई शोषण र हिंसाबाट सुरक्षित गर्नु । तर के यो प्रतिबन्धले महिलाहरूलाई साँच्चिकै सुरक्षित बनाउन सक्यो रु यथार्थ हेर्दा, प्रतिबन्धले घरेलु कामदारका रूपमा विदेश जाने क्रम रोकिएको छैन । हाम्रा महिलाहरुलाई खाडिसम्म पुर्याउन एजेन्टहरुले विभिन्न वैैकल्पिक रुट प्रयोग गरिरहेको छन् । कहिले भारत हुँदै, कहिले अफ्रिकी मुलुकहरूलाई ट्रान्जिट बनाएर उनीहरूलाई गन्तव्य देशसम्म पुर्याइन्छ ।’
सांसद ओलीले मानव बेचबिखनमा संलग्न एजेन्ट नेटवर्क नेपालबाट ध्वस्त पार्न आवश्यक रहेको भन्दै अहिले १० देखि १२ लाख रुपैयाँसम्म लिएर महिलाहरूलाई कुवेतलगायत मुलुकमा बेच्ने काम भइरहेको दाबी गर्नुभयो।
‘सारा मान्छे बेच्ने एजेण्ड नेटवर्क नेपालबाट ध्वस्त हुनु आवश्यक छ । अहिले १० देखि १२ लाखमा महिलाहरुलाई कुवेतमा बेच्ने काम गरिराखेका छन् । एजेण्डहरुको छिनोफानो राज्यले नगरेसम्म चेलिबेटीहरु बेचिरहन्छन्,’ उहाँले भन्नुभयो ।
