झापा, ६ जेठ । झापाको अर्जुनधारा नगरपालिकामा मदिरा सेवनपछि भएको विवादका क्रममा घाइते भएकी एक महिलाको उपचारका क्रममा दुःखद निधन भएको छ। मृत्यु हुनेमा अर्जुनधाराकी २९ वर्षीया काजल बस्नेत सुवेदी रहेकी छन्।
प्रहरीका अनुसार गत जेठ ४ गते राति अर्जुनधारा–८ स्थित खुला चौरमा अत्यधिक मदिरा सेवनपछि आपसी विवाद भएको थियो। सोही क्रममा एक युवकले धकेल्दा काजल कङ्क्रिट संरचनामा ठोक्किएर टाउकोमा गम्भीर चोट लागेको थियो।
स्थानीयबासीको सहयोगमा उनलाई उपचारका लागि तत्काल अस्पताल पुर्याइए पनि उपचारकै क्रममा आज (मंगलबार) बिहान उनको मृत्यु भएको प्रहरीले जनाएको छ।
घटनामा संलग्न रहेको आरोपमा अर्जुनधारा–५ का २४ वर्षीय युवकलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको इलाका प्रहरी कार्यालयले जनाएको छ।
