काठमाडौं ,६ जेठ। सञ्चार तथा सूचना प्रविधि मन्त्री डा।विक्रम तिमिल्सिनाले प्रेस स्वतन्त्रताप्रति सरकार पूर्ण प्रतिबद्ध रहेको बताउनु भएको छ ।
बुधबार प्रतिनिधिसभाको बैठकमा सांसदहरूले उठाएका प्रश्नको जवाफ दिँदै मन्त्री तिमिल्सिनाले प्रेस स्वतन्त्रता संविधानले सुनिश्चित गरेको अधिकार भएकाले कसैले पनि त्यसलाई कुण्ठित गर्न नसक्ने बताउनु भएको हो ।
उहाँले भन्नु भयो, ‘प्रेस स्वतन्त्रताप्रति सरकार पूर्ण प्रतिवद्ध छ । यो कोही सरकारको एउटा व्यक्तिले होइन की संविधानले दिएको अधिकार हो । यो अधिकार सुरक्षित छ, आज, भोलि र पर्सी कसैले पनि यो अधिकार कुष्ठित गर्न सक्दैन, हनन गर्न सक्दैन । तर प्रेस स्वतन्त्रता भनेको स्वछन्दता भने होइन । प्रेस स्वतन्त्रतासँगै जवाफदेहिता पनि आउँछ । राज्यले व्यवस्थाले एउटा महत्वपूर्ण अंगको रुपमा स्विकारेको एउटा महत्वपूर्ण क्षेत्रले आफ्नो ओजलाई, आफ्नो गरिमालाई कायम गर्ने गरि कार्य गर्दाखेरि सरकारले चाहेर पनि प्रेस स्वतन्त्रताको विरुद्धमा केही गर्न नसक्ने व्यवस्थाका बीचमा हामी छौं ।’
उहाँले प्रेस स्वतन्त्रता स्वच्छन्दता नभएको उल्लेख गर्दै प्रेससँग जवाफदेहिता र मर्यादा पनि जोडिएको धारणा राखे । पत्रकारिता क्षेत्रले आफ्नो गरिमा र सीमालाई कायम राख्दै काम गरे सरकारले चाहेर पनि प्रेस स्वतन्त्रताविरुद्ध कुनै कदम चाल्न नसक्ने उहाँको भनाइ थियो ।
मन्त्री तिमिल्सिनाले पत्रकारिता जगतलाई आफ्नो मर्यादा र जिम्मेवारीलाई ध्यानमा राखेर ढुक्कसँग काम गर्न आग्रह गर्नुभयो ।
उहाँले भन्नु भयो, हामीले प्रेसले आफ्नो गरिमा र सीमालाई कायम राख्न सक्नुपर्छ, प्रेसले आफ्नो गरिमा र सीमालाई कायम गर्दा सरकारले चाहेर केही गर्न सक्दैन । त्यसकारण गरिमा र सीमालाई ख्याल गरेर ढुक्क भएर काम गर्न म पत्रकारिता जगतलाई आग्रह गर्दछु ।’
त्यसैगरी, उहाँले प्रेसलाई नियन्त्रित गर्ने सरकारको कुनै मनसाय नरहेको स्पष्ट पार्दै प्रेस काउन्सिल नेपाल र चलचित्र सेन्सर बोर्डलाई थप सक्षम बनाउन सरकार प्रतिबद्ध रहेको बताउनु भएको छ । मन्त्री तिमिल्सिनाले सरकारको नीति तथा कार्यक्रम तथा बजेटका प्राथमिकतासम्बन्धी सांसदहरूले दिएका सुझाव र उठाएका प्रश्नलाई गम्भीरतापूर्वक मनन् गरिने विश्वाससमेत व्यक्त समेत गर्नु भयो ।
