दमक, असार १०। दमक नगरपालिकाले आगामी आर्थिक वर्ष २०८३/०८४ को बजेट तथा कार्यक्रममार्फत विकास, रोजगारी, शिक्षा, स्वास्थ्य, वातावरण र सुशासनलाई प्राथमिकतामा राखेको जनाएको छ।
नगरपालिकाको १९ औँ नगरसभामा उपप्रमुख रेगिना भट्टराई प्रसाईले बजेट तथा कार्यक्रम प्रस्तुत गर्दै आगामी वर्षका लागि नगरका विकास गतिविधि पाँच प्रमुख आधारमा केन्द्रित गरिने जानकारी दिनुभयो।
उहाँका अनुसार गुणस्तरीय तथा दिगो पूर्वाधार निर्माणलाई पहिलो प्राथमिकतामा राखिएको छ। यससँगै स्थानीयस्तरमा रोजगारी सिर्जना गर्दै आर्थिक समुन्नति हासिल गर्ने लक्ष्य लिइएको छ।
त्यस्तै, शैक्षिक गुणस्तर अभिवृद्धि, सामाजिक विकास तथा गुणस्तरीय स्वास्थ्य पूर्वाधार विस्तारलाई पनि नगरपालिकाले विशेष प्राथमिकता दिएको छ। बढ्दो प्राकृतिक विपद्को जोखिमलाई मध्यनजर गर्दै विपद् व्यवस्थापन तथा वातावरणीय सन्तुलन कायम गर्ने कार्यक्रमलाई समेत बजेटले समेटेको छ।
नगरपालिकाले सुशासन प्रवर्द्धन गर्दै सेवा प्रवाहलाई थप प्रभावकारी, पारदर्शी र नागरिकमैत्री बनाउने प्रतिबद्धता पनि व्यक्त गरेको छ।
उपप्रमुख प्रसाईले सार्वजनिक गर्नुभएको बजेट तथा कार्यक्रमले समृद्ध, सुरक्षित र व्यवस्थित दमक निर्माणका लागि विकासका बहुआयामिक क्षेत्रलाई समेट्ने प्रयास गरेको नगरपालिकाको भनाइ छ।
