इलाम,२५ असार । निरन्तरको वर्षा र कमजोर भूबनोटका कारण इलाम नगरपालिका–९ स्थित माइखोला (राजदुवाली) क्षेत्रमा मेची राजमार्गको सडक भासिएपछि बिहीबार बिहानदेखि राजमार्ग पूर्ण रूपमा अवरुद्ध भएको छ।
पूर्वी पहाडी जिल्लाहरूको ‘लाइफलाइन’ मानिने यो राजमार्ग बन्द हुँदा इलाम, पाँचथर र ताप्लेजुङको झापासँगको मुख्य सडक सम्पर्क विच्छेद भएको छ।
राजमार्ग अवरुद्ध भएपछि मालवाहक ट्रक, एम्बुलेन्स र यात्रुवाहक सवारीसाधन बाटोमै रोकिएका छन्। तराईबाट पहाडतर्फ आउने सवारी माइखोला बजार क्षेत्रमा र पहाडबाट झापातर्फ जाने सवारी गोलाखर्क भञ्ज्याङमा रोकिएका छन्। यात्रुहरू जोखिमपूर्ण बाटो हिँडेर पार गर्न बाध्य भएका छन्।
सडक अवरुद्ध हुँदा आकस्मिक उपचारका लागि झापा वा विराटनगर लैजानुपर्ने बिरामीहरू सबैभन्दा बढी प्रभावित भएका छन्। एम्बुलेन्स अघि बढ्न नसक्दा बिरामीलाई स्ट्रेचरमा बोकेर हिलो र जोखिमपूर्ण बाटो पार गराउनुपर्ने अवस्था सिर्जना भएको छ।
यता, इलाम र पाँचथरका कृषकहरूले उत्पादन गरेको दूध, तरकारीलगायत छिट्टै कुहिने कृषि उपज बजारसम्म पु¥याउन नसक्दा लाखौँ रुपैयाँ बराबरको क्षति हुने चिन्ता बढेको छ। सम्बन्धित निकायले सडक खुलाउने प्रयास गरिरहेको भए पनि वर्षा नरोकिएकाले तत्काल सञ्चालनमा ल्याउन चुनौती देखिएको छ।
