दमक /
दमक नगरपालिकामा ‘दमक सपिङ कम्प्लेक्स’ बन्ने भएको छ । कुल ६१ करोड १४ लाख रुपैयाँ अनुमानित लागत रहने यस सपिङ कम्प्लेक्सका लागि नगर विकास कोषले ४२ करोड ८० लाख रुपैयाँ ऋण प्रदान गर्ने भएको छ ।
‘दमक सपिङ कम्प्लेक्स’ निर्माणका लागि दमक नगरपालिका र नगर विकास कोषबीच ऋण सम्झौता पनि सम्पन्न भएको छ । सम्झौता अनुसार कुल अनुमानित लागतको ७०% ऋण रकम कोषको तर्फबाट र ३०% रकम दमक नगरपालिकाले व्यहोर्ने छ ।
ऋण सम्झौतामा नगर विकास कोषका कार्यकारी निर्देशक कृष्णप्रसाद सापकोटा र दमक नगरपालिकाका प्रमुख रोमनाथ ओलीले हस्ताक्षर गरेका छन् । दमक नगरपालिकाको करिब ८ कठ्ठा १३ धुर क्षेत्रफलमा निर्माण हुने यो आयोजनालाई नगरपालिकाको महत्वपूर्ण आयोजनाको रुपमा लिइएको छ। दमक सपिङ कम्प्लेक्स शहरी पूर्वाधार निर्माणमा कोषको हालसम्मकै ठूलो लागतको आयोजना रहेको जानकारी गराइएको छ ।
कोषले नगरपालिकाहरुमा शहरी पूर्वाधारका आयोजनामा बढी भन्दा बढी वित्तीय तथा प्राविधिक सहायता प्रदान गरी व्यवस्थित र सुविधा सम्पन्न शहरको निर्माण तथा विकासमा योगदान गर्ने उद्देश्य रहेको जानकारी गराएको छ । सोही उद्देश्य अनुरुप दमक नगरपालिकाका नगरवासीलाई व्यवस्थित, सुरक्षित तथा आधुनिक प्रविधीयुक्त सेवा सुविधा उपलब्ध गराउन लक्ष्य अनुसार दमक नगरपालिकाबाट सपिङ कम्प्लेक्स निर्माण हुन लागेको हो ।
