सरकारले सार्वजनिक सवारीको भाडा बढाउने निर्णय गरेको छ ।
भौतिक पूर्वाधार तथा यातायात मन्त्रालयले सार्वजनिक सवारीको भाडा बढाउने निर्णय गरेको हो । आउँदो आइतबार यातायात व्यवस्था विभागले अन्तरप्रदेश रुटको सूचीसहित नयाँ भाडादर प्रकाशित गर्ने जनाएको छ ।
यातायात व्यवसायीहरूले इन्धनको मूल्य वृद्धि भएपश्चात् नै आवाज उठाउँदै आएका थिए । प्रदेश १ का यातायात व्यवसायीहरूले प्रदेश १ सरकारमार्फत् केन्द्र सरकारलाई ज्ञापन–पत्र बुझाएका थिए ।
तर, सरकारले त्यसको सुनुवाइ गरेको थिएन । मन्त्रालयले मालवाहकसहित पहाडी तथा तराई क्षेत्रका भूगोलअनुसार १० देखि १४ प्रतिशतसम्म भाडा बढाउने निर्णय गरेको हो ।
इन्धनको मूल्य वृद्धि भएका आधारमा लामो दूरीमा चल्ने सार्वजनिक सवारीको भाडा बढाउने निर्णय गरेको छ । सङ्घले भाडादर वृद्धि गरेअनुसार नै प्रदेशले पनि छोटो दूरीका यातायातको पनि भाडादर वृद्धि गर्नेछन् । यातायात व्यवसायी राष्ट्रिय महासङ्घ प्रदेश तथा केन्द्रले भाडादर वृद्धि गर्न भन्दै पटक–पटक ज्ञापन–पत्र बुझाएको छ ।
