धनकुटा,१२ साउन । तमोर करिडोरअन्तर्गत धनकुटाको चौबिसे गाउँपालिका–४ फलामेटारमा सोमबार राति हाइड्रोपावरका सामग्री बोकेको ट्रक दुर्घटना भई भीषण आगलागी हुँदा चालकको जलेर मृत्यु भएको छ। दुर्घटनामा सहचालक घाइते भएका छन्। विराटनगरबाट ताप्लेजुङतर्फ जाँदै गरेको प्रदेश १–०२–००१ क ५३६३ नम्बरको लो–बेड ट्रक राति करिब ८ः३० बजे सडकबाट चिप्लिएर नालामा पल्टिएको थियो। पल्टिने क्रममा ट्रकको इन्धन ट्याङ्की विस्फोट भई आगलागी भएको जिल्ला प्रहरी कार्यालय धनकुटाका प्रहरी उपरीक्षक नारायण रञ्जितकारले जानकारी दिनु भयो।
आगलागीमा परेर ट्रकभित्रै च्यापिएका भोजपुर घर भएका अन्दाजी ३० वर्षीय चालक विशाल राईको घटनास्थलमै मृत्यु भएको हो। उहाँको शव सोमबार राति नै निकालिएको छ। दुर्घटनामा सामान्य घाइते भएका सहचालकको उपचार भइरहेको छ। घटनालगत्तै प्रहरी उपरीक्षक रञ्जितकारको कमान्डमा पुगेको टोलीले उद्धार कार्य गरेको थियो। दुर्घटनाको थप कारणबारे प्रहरीले अनुसन्धान अघि बढाएको छ।
