काठमाडौं,१४ साउन । राष्ट्रिय स्वतन्त्र पार्टी (रास्वपा)की सांसद समिना मियाँले सुनसरीको देवानगञ्ज गाउँपालिका–कप्तानगञ्ज क्षेत्रमा भएको साम्प्रदायिक तनावप्रति गम्भीर चिन्ता व्यक्त गर्नु भएको छ । प्रतिनिधिसभा बैठकमा बोल्दै सांसद मियाँले पछिल्लो समय देशका विभिन्न जिल्लामा विभिन्न घटना भइरहेका उल्लेख गर्दै देवानगञ्जको घटनाले देशलाई स्तब्ध बनाएको बताउनु भयो।
‘विभिन्न जिल्लाहरूमा विभिन्न घटनाहरू घटे र त्यसमध्ये पनि एउटा संवेदनसिल घटनाले देशलाई स्तब्ध बनाएको छ,’ उहाँले भन्नु भयो, ‘देवानगन्चको कप्तानगन्जमा भएको मुस्लिम र हिन्दू समुदाय बिच द्वन्द्व मच्चियो । म सम्पूर्ण देशबासी र सम्पूर्ण राजनीतिक दललाई देशमा मिलेर बसेका दुईवटा धर्मका जातजतिहरुलाई आफ्नो राजनीतिक रोटी सेक्ने काम बन्द गर्नुहोस ।’ मियाँले धार्मिक सद्भावलाई राजनीतिक स्वार्थका लागि प्रयोग नगर्न सबै राजनीतिक दललाई आग्रह गर्नु भयो।
उहाँले मुस्लिम र हिन्दु समुदायबीच उत्पन्न भएको द्वन्द्वप्रति दुःख व्यक्त गर्दै वर्षौंदेखि मिलेर बसेका दुई समुदायबीच विभाजन सिर्जना गर्ने गतिविधि रोक्न आग्रह गर्नु भयो। ‘तपाईँहरूले देशमा मिलेर बसेका दुईवटा सिधासाधा जनताहरूलाई लडाएर आफ्नो राजनीतिक यात्रा अगाडि बढाउने जुन कदम चाल्नु भएको छ त्यसप्रति म घोर आपत्ति जनाउन चाहन्छु,’ उहाँले भन्नु भयो।
