काठमाडौं,१९ साउन । राष्ट्रिय स्वतन्त्र पार्टी (रास्वपा) की सांसद श्रद्धा कुँवर क्षेत्रीले पछिल्ला केही दिनयता देशमा जटिल र गम्भीर प्रकृतिका विभिन्न समस्या देखिएको बताउनु भयो । मंगलबार प्रतिनिधिसभाको बैठकमा उहाँले व्यक्तिगत स्वार्थ र राजनीतिक लाभ–हानिभन्दा माथि उठेर सामूहिक रूपमा काम गरे समाधान सम्भव हुने बताउनु भयो । उहाँले भन्नु भयो, ‘पछिल्ला केही दिनहरूमा नेपालमा जटिल र गम्भीर प्रकृतिका समस्याहरू देखा परेका छन् । जसले हामी सबैलाई तरङगित बनायो । तर व्यक्तिगत स्वार्थ र राजनीतिक लाभहानी भन्दा माथि उठेर समुहिक पहल गर्ने हो भने सबै समस्याको समाधान निकाल्न सकिन्छ भन्ने पनि देखिएको छ ।’
उहाँले जनप्रतिनिधिहरूले स्थानीय तहमा पुगेर नागरिकसँग प्रत्यक्ष संवाद गर्दा समाजमा विभिन्न समस्या देखिएको र ती समस्याको समाधान सरकारले गर्ने अपेक्षा नागरिकमा अझै कायम रहेको अनुभव भएको बताउनु भयो ।उहाँले भन्नु भयो,‘हामी स्थानीय मतदाता र नागरिकहरूसँग संवाद गर्न जनताका घर आँगनसम्म पुग्यौं । समाजमा धेरै प्रकारका समस्या छन् । सरकाले ती समस्या समाधान गरिदिन्छ कि भन्नेमा आशावादी छौं ।’
सरकारी अस्पतालमा खोप र क्यान्सरका अत्यावश्यक औषधिको अभाव रहेको भन्दै सरकारको गम्भीर ध्यानाकर्षण गराउनु भयो । उहाँले क्यान्सर उपचारका लागि आवश्यक केही अत्यावश्यक औषधिसमेत अभावमा रहेको भन्दै यसको कारणबारे सरकारसँग स्पष्ट जवाफ माग्नु भयो ।
उहाँले भन्नु भयो, ‘सरकारी अस्पतालमा रेविजविरुद्धको खोपको हाहाकार छ । तर त्यही खोप थोरै महँगो मूल्य तिर्दा निजी क्लिनिकहरुलाई सजिलै उपलब्ध छ । क्यान्सर रोगका अति आवश्यक केही अैषधिहरु पनि अभाव छ । यो कृतिम अवस्था हो की सरकारले व्यवस्था गर्दागर्दै पनि सम्बन्धित निकायले उचित व्यवस्थापन गर्न नसकेको हो ?’
