काठमाडौं,१९ साउन । अर्थविद् प्रा.डा. गोपीलाल न्यौपानेले ककनी गाउँपालिकाले काठमाडौं उपत्यकाको फोहोर व्यवस्थापनमा खेलेको भूमिकाको उचित मूल्याङ्कन हुनुपर्ने बताउनु भएको छ । उहाँले ककनीलाई फोहोर थुपार्ने स्थानका रूपमा मात्र हेर्ने प्रवृत्ति अन्त्य गरी विकास, लगानी र सम्भावनाको केन्द्रका रूपमा अघि बढाउनुपर्ने धारणा राख्नु भएको छ। राष्ट्रिय प्रेस क्लबले स्थानीय तहका समस्या र सम्भावनाबारे आयोजना गरेको अन्तरक्रियामा बोल्दै न्यौपानेले काठमाडौं, ललितपुर, भक्तपुर, काभ्रे र सिन्धुपाल्चोक लगायत क्षेत्रबाट उत्पादन हुने फोहोर ककनीले लामो समयदेखि व्यवस्थापन गर्दै आएको उल्लेख गर्नु भयो। उहाँले फोहोर उत्पादन गर्ने क्षेत्रले नै त्यसको व्यवस्थापनको जिम्मेवारी र योगदान सुनिश्चित गर्नुपर्ने बताउनु भयो।
‘आफूले उत्पादन गरेको फोहोर अर्को नागरिकले वर्षौँसम्म निःशुल्क रूपमा सहनुपर्ने अवस्था न्यायपूर्ण हुन सक्दैन,’ न्यौपानेले भन्नु भयो । ककनीवासीले दुर्गन्ध, स्वास्थ्य समस्या र सामाजिक असर सहँदै आएको भन्दै उहाँले उनीहरूको योगदानको सम्मान हुनुपर्ने धारणा राख्नु भयो। उहाँले ककनी गाउँपालिकाका अध्यक्ष सुमन तामाङ र वडा नम्बर ३ का अध्यक्ष घनश्याम लगायत जनप्रतिनिधिहरूले परिवर्तनको चाहनासहित काम गरिरहेको भन्दै प्रशंसा गर्नु भएको छ। स्थानीय तहले सडक निर्माणलगायत केही सकारात्मक काम अघि बढाए पनि ककनीमा गर्नुपर्ने काम अझै धेरै बाँकी रहेको उहाँको भनाइ थियो ।
न्यौपानेले ककनीको विकासका लागि स्थानीय तहले दीर्घकालीन योजना बनाएर काठमाडौं उपत्यकाका स्थानीय सरकारहरूसँग सहकार्य गर्नुपर्ने सुझाव दिनु भयो । उहाँले ककनीले १० अर्ब, २० अर्ब वा ५० अर्ब रुपैयाँसम्मका ठूला परियोजनाको अवधारणा तयार गरी काठमाडौं, ललितपुर, भक्तपुरलगायत स्थानीय सरकारसमक्ष प्रस्तुत गर्नुपर्ने बताउनु भयो ।
