काठमाडौं,२१ साउन । मेडिकल व्यवसायी दुर्गा प्रसाईंले राजसंस्था हटाइएपछि नेपालमा विदेशी चलखेल बढेको दाबी गर्दै आगामी फागुन २१ गते हुने चुनावलाई नेपाल र नेपालीका लागि ‘पासो’को संज्ञा दिनु भएको छ। बिहीबार आयोजित पत्रकार सम्मेलनमा प्रसाईंले नेपालमा राजसंस्था रहँदा देश पशुपति, सगरमाथा, माता दुर्गा तथा वेदको भूमिका रूपमा चिनिने गरेको उल्लेख गर्दै अहिलेको राजनीतिक नेतृत्वले समाजलाई विभाजित गरेको आरोप लगाउनु भयो।
उहाँले भन्नु भयो, ‘जतिखेर नेपालमा राजसंस्था थियो, पशुपतिको देश, सगरमाथाको देश, माता दुर्गाको देश भनेर चिनिन्थ्यो। यो वेद लेखिएको तपोभूमि हो। तर अहिलेको नेतृत्व पैसामा बिक्ने नेतृत्व बनेको छ। सिंहदरबार जलाइयो, सर्वोच्च अदालत जलाइयो, विभिन्न व्यक्तिका घर जलाइए, त्यस्ता घटनामा संलग्नलाई नेपाली जनताले अनुमोदन गरेर सत्तामा पुर्याए।’प्रसाईंले संविधानसभाको पहिलो बैठकबाट धर्मनिरपेक्षता र राजसंस्था हटाउने व्यवस्था अन्तरिम संविधानमा समावेश गरिएकै दिनदेखि नेपालले दुःख भोग्न थालेको दाबी गर्नु भयो।
उहाँले भन्नु भयो, ‘राजा हुँदासम्म विदेशीहरूले नेपालमा चलखेल गर्न पाएका थिएनन्। संविधानसभाको पहिलो बैठकमै धर्मनिरपेक्षता र राजसंस्था हटाउने व्यवस्था गरियो, त्यही दिनदेखि नेपालीलाई दशा लाग्यो।’उहाँले आगामी फागुन २१ गतेको चुनावलाई ‘नेपाल र नेपालीहरूको पासो’ भएको टिप्पणी गर्दै नेपाली सेना, नेपाल प्रहरी, सशस्त्र प्रहरी बल र निजामती कर्मचारीलाई पनि सम्बोधन गर्नु भयो। ‘अब तपाईँहरूको देश रहनेवाला छैन,’ उहाँले भन्नु भयो ।
प्रसाईंले सुनसरीमा भएको घटनाबारे प्रधानमन्त्री र गृहमन्त्रीमाथि पनि आरोप लगाउँदै सेना परिचालनको विषयमा प्रश्न उठाउनु भयो।‘सुनसरीमा भएको घटना प्रधानमन्त्री र गृहमन्त्रीकै कारण भएको हो। मलाई संसारको जहाँ लगेर झुण्ड्याए पनि हुन्छ। सेना त्यतिकै परिचालन हुँदैन, मन्त्रिपरिषद्को निर्णय र राष्ट्रपतिको हस्ताक्षर आवश्यक पर्छ। तर सेना त्यसरी परिचालन गरिएको छ,’ उहाँले आरोप लगाउनु भयो।
