काठमाडौं,२५ साउन । राष्ट्रिय स्वतन्त्र पार्टी (रास्वपा)का सांसद शिवशंकर यादवले सदनमा आलोचना र बहस हुनुपर्ने विषय अन्यत्र भए पनि बहस ‘कालो चस्मा’मा सीमित भएको बताउनु भएको छ।
सोमबार बसेको प्रतिनिधिसभा बैठकमा बोल्दै उहाँले दशकौँदेखि मधेसी समुदायलाई हेर्ने विभेदकारी दृष्टिकोण, कर्णाली र सुदूरपश्चिमप्रतिको उपेक्षा तथा दलित, आदिवासी जनजाति र सीमान्तकृत समुदायमाथि दोस्रो दर्जाका नागरिकसरह गरिने व्यवहारबारे बहस हुनुपर्ने बताउनु भयो ।
‘सदनमा आलोचना हुनुपर्ने विषय अर्कै थियो, तर बहस अर्को तिर मोडिएको छ । दशकौँदेखि मधेसीलाई हेर्ने कालो नजर, कर्णाली र सुदूरपश्चिमलाई हेर्ने उपेक्षाको दृष्टिमाथि बहस हुनुपर्ने थियो,’ उहाँले भन्नु भयो, ‘तर आज संसद्मा बहस कालो चस्मामाथि सीमित भइरहेको छ ।’
उहाँले हटाउनुपर्ने ‘कालो चस्मा’ नभई मनमा बसेको विभेदकारी सोच भएको बताउनु भयो ।
‘बिपी कोइरालो पनि कालो चस्मा लगाउनु हुन्थियो तर उहाँको सोच कालो थिएन । दृष्टिकोण साँगुरो थिएन । हटाउनु पर्ने त्यो कालो चस्मा होइन । मनमा बसेको त्यो कालो सोच हो, उहाँले भन्नु भयो, ‘मधेसीमाथि हेर्ने कालो सोच छ । दलितमाथि हेर्ने कालो सोच छ । त्यो हटायो भने मात्र हाम्रो देश समृद्धिको दिशा तिर अगाडी बढ्न सक्छ ।’
उहाँले मधेसी, दलितलगायत समुदायप्रति रहेको विभेदपूर्ण मानसिकता अन्त्य नगरेसम्म देश समृद्धिको दिशामा अघि बढ्न नसक्ने बताउनु भयो ।
