काठमान्डौं ,२५ साउन । सरकार गठन भएको चार महिनापछि प्रधानमन्त्री बालेन्द्र शाह कूटनीतिक भेटघाटमा सक्रिय हुनु भएको छ। यसअघि विदेशी राजदूत तथा पाहुनासँग एक्लाएक्लै भेट नगर्ने अडान लिनु भएका शाहले सोमबार भारतीय राजदूत नवीन श्रीवास्तवसँग भेटवार्ता गर्नु भएको छ।
प्रधानमन्त्री शाहले सोमबार नै चिनियाँ राजदूत र मंगलबार कार्यवाहक अमेरिकी राजदूतसँग पनि भेटवार्ता गर्ने कार्यक्रम रहेको परराष्ट्र मन्त्रालयले जनाएको छ। यी भेटमा परराष्ट्रमन्त्री शिशिर खनाल सहभागी नहुने बताइएको छ।
भारतीय राजदूतसँगको भेटमा नेपाल–भारत सम्बन्ध, विकास साझेदारी, पारस्परिक हित तथा सहकार्यका विषयमा छलफल भएको जनाइएको छ। भेटका क्रममा भारतीय प्रधानमन्त्री नरेन्द्र मोदीले शाहलाई बधाई सन्देश पठाएको जानकारीसमेत दिइएको छ।
यसअघि प्रोटोकलको विषय उठाउँदै विदेशी प्रतिनिधिसँग भेट गर्न अस्वीकार गर्दै आएका शाहले चार महिनापछि आफ्नो अडान परिवर्तन गर्नु भएको हो। पछिल्लो समय उनी विज्ञ, उद्योगी तथा विभिन्न समूहसँग भेटघाट गर्दै सुझावसमेत लिइरहनु भएको छ ।
प्रधानमन्त्रीको भारत र चीन भ्रमणको चर्चा भइरहे पनि मिति भने तय भइसकेको छैन। उता, राष्ट्रिय स्वतन्त्र पार्टीका सभापति रवि लामिछानेको भारत भ्रमणपछि प्रधानमन्त्री शाह पनि छिमेकी मुलुकसँगको सम्बन्ध विस्तारमा सक्रिय भएको चर्चा हुन थालेको छ।
