झापा दमक ,२६ साउन। झापाको दमकदेखि इलामको माङसेबुङ हुँदै पाँचथरको चिसोपानी पञ्चमी जोड्ने फाल्गुनन्द मार्गमा भारी मालवाहक सवारीसाधन सञ्चालनमा रोक लगाइएको छ।
माङसेबुङ गाउँपालिका क्षेत्रमा अविरल वर्षाका कारण सडकका विभिन्न स्थानमा क्षति पुगेपछि ट्रक, टिपर, ट्रेलरलगायत भारी मालवाहक सवारीसाधन सञ्चालनमा अनिश्चितकालका लागि रोक लगाइएको हो।
सडक मर्मत तथा पुनःस्थापनाको काम भइरहेकाले सडकलाई सुरक्षित र व्यवस्थित बनाउन मालवाहक सवारीसाधनलाई वैकल्पिक मार्ग प्रयोग गर्न गाउँपालिकाले आग्रह गरेको छ।
गाउँपालिकाका कार्यवाहक अध्यक्ष विनोदकुमार नेम्बाङका अनुसार उपभोक्ता समितिको आग्रहमा मर्मतसम्भारको काम सुरक्षित र समयमै सम्पन्न गर्न यस्तो निर्णय गरिएको हो। अत्यावश्यक वस्तु ढुवानी गर्ने सवारीसाधन भने सञ्चालन गर्न पाउने व्यवस्था गरिएको छ।
वर्षाका कारण सडक क्षतिग्रस्त भएपछि मालवाहक सवारीसाधनका कारण विभिन्न स्थानमा जाम हुन थालेको थियो। मर्मतसम्भारको काम पूरा नभएसम्म यात्रुवाहक सवारीसाधनको आवतजावत सहज बनाउन भारी मालवाहक सवारीमा रोक लगाइएको गाउँपालिकाले जनाएको छ।
दमक–चिसोपानी सडक निर्माण सुरु भएको तीन दशक बितिसक्दा पनि पूर्ण रूपमा निर्माण हुन सकेको छैन। हिउँदमा धुलो र वर्षायाममा हिलोका कारण यात्रुले सास्ती खेप्दै आएका छन्। कालोपत्र हुन नसकेको सडक वर्षायाममा थप जोखिमपूर्ण बन्ने गरेको छ।
फाल्गुनन्द मार्गले झापा, इलाम र पाँचथरलाई जोड्छ। तीन जिल्लाका हजारौँ नागरिकले आवतजावत तथा कृषि उत्पादन बजारसम्म पुर्याउन यही सडक प्रयोग गर्दै आएका छन्। लामो समयदेखि सडक निर्माणमा भइरहेको ढिलाइप्रति स्थानीयवासी असन्तुष्ट छन्।
