दमक, २७ साउन । दमकका सडक र चोकमा रहेका बिजुलीका पोलमा इन्टरनेट तथा केबल सेवाप्रदायक कम्पनीले जथाभावी झुण्ड्याएका तारको गुजुल्टो बढ्दै गएपछि दुर्घटनाको जोखिमसँगै सहरको सौन्दर्यमाथि समेत प्रश्न उठ्न थालेको छ।
तपाईंले दमकका सडकमा हिँड्दा बिजुलीका पोलमा अस्वाभाविक रूपमा थुप्रिएका तारका गुजुल्टो देख्नुभएको हुन सक्छ। कतिपय पोलमा एउटै कम्पनीका मात्र होइन, विभिन्न इन्टरनेट तथा केबल कम्पनीका तार एकै ठाउँमा बेरिएका छन्। हेर्दा सामान्य लाग्ने यस्ता तारले कुनै बेला ठूलो दुर्घटना निम्त्याउन सक्ने भन्दै सरोकारवालाले चिन्ता व्यक्त गरेका छन्।
दमकमा अहिले गल्ली–गल्लीमा इन्टरनेट कम्पनीका सेवा विस्तार भएका छन्। ग्राहकको घरसम्म सेवा पु¥याउन तार तान्नु आवश्यक भए पनि त्यसका लागि आफ्नै पोलको व्यवस्था नगरी विद्युत्का पोलमा निर्भर हुने प्रवृत्ति बढेको छ। विद्युत् प्राधिकरणले पोलको भार र क्षमताका आधारमा संरचना व्यवस्थापन गर्ने भए पनि त्यसैमा थपिँदै गएका इन्टरनेट तथा केबलका तारले पोलमा अतिरिक्त भार थपिरहेका छन्।समस्या केवल तार तान्नेसम्म सीमित छैन। सेवा विस्तार वा मर्मतका क्रममा प्रयोगविहीन तार हटाउने, व्यवस्थित गर्ने र पोलमा सुरक्षित ढंगले राख्ने काममा समेत लापरबाही देखिन्छ। एउटै पोलमा एकपछि अर्को गर्दै थपिएका तारका गुजुल्टो अहिले दमकका धेरै स्थानमा सहजै देख्न सकिन्छ।
यस्ता तार चुँडिएर सडकमा खसेमा पैदलयात्री तथा सवारीसाधन जोखिममा पर्न सक्छन्। विद्युत्को तारसँग सम्पर्कमा आएर आगलागी वा करेन्ट फैलिने अवस्था सिर्जना भए त्यसको असर आसपासका घर तथा बस्तीमा समेत पर्न सक्ने जोखिम छ। अझ भीडभाड हुने बजार क्षेत्र र सार्वजनिक कार्यक्रम आयोजना हुने स्थानमा यस्तो जोखिमलाई सामान्य रूपमा लिन नहुने सरोकारवालाको भनाइ छ। यही अवस्थालाई मध्यनजर गर्दै दमक नगरपालिका–६ ले वडामा सक्रिय इन्टरनेट तथा केबल व्यवसायीलाई बोलाएर छलफल गरेको छ। वडाले व्यवसायीका समस्या सुनेपछि पोलमा रहेका अव्यवस्थित तार तत्काल हटाउने निष्कर्ष निकालेको छ।
वडा कार्यालयले कुन कम्पनीका तार कुन–कुन पोलमा रहेका छन् भन्ने विवरणसमेत अवलोकन गरी साउन २९ गतेसम्म तार व्यवस्थापन गर्न चेतावनीसहितको सार्वजनिक सूचना जारी गरेको छ। तोकिएको समयभित्र अव्यवस्थित तार व्यवस्थापन नभए वडा, नगर प्रहरी र नेपाल प्रहरीको सहयोगमा तार काटेर हटाउने अभियानसमेत सञ्चालन गर्ने वडा अध्यक्ष टेकबहादुर थापाले जानकारी दिनुभएको छ ।
यसअघि पनि अव्यवस्थित तारका कारण दमकको सडक सौन्दर्यमा असर परेको भन्दै पटक–पटक आवाज उठ्दै आएको थियो। अब भने वडाले समस्या समाधानका लागि सक्रियता देखाएको हो।विशेषगरी आगामी भदौ २० गते दमकमा आयोजना हुने बृहत् श्रीकृष्ण रथयात्रालाई समेत मध्यनजर गर्दै पोलमा रहेका तार व्यवस्थापन गर्नुपर्ने आवश्यकता देखिएको छ। रथयात्राको मार्गमा रहेका यस्ता तार रथको आवागमनमा बाधक बन्न सक्ने तथा दुर्घटनाको जोखिम बढाउन सक्ने भएकाले समयमै व्यवस्थापन गर्नुपर्ने देखिन्छ।
इन्टरनेट र केबल सेवा आजको आवश्यकता हो। तर सेवा विस्तारका नाममा सार्वजनिक संरचना असुरक्षित बनाउने छुट कसैलाई छैन। त्यसैले ग्राहकको घरसम्म तार पु¥याउनु मात्र होइन, प्रयोगमा नरहेका तार हटाउने, नयाँ तार व्यवस्थित गर्ने र सार्वजनिक सडक तथा पोललाई सुरक्षित राख्ने जिम्मेवारी पनि सम्बन्धित व्यवसायीले लिनुपर्ने देखिन्छ।
