काठमाडौँ,२९ साउन । काठमाडौँमा जारी नेपाली कांग्रेस इतर समूहको राष्ट्रिय भेलामा वक्ताहरूका लागि समयको नियम लागू गरिएको छ। भेला आयोजक समितिले प्रत्येक वक्तालाई आफ्नो धारणा राख्नका लागि केवल ३ मिनेटको समय उपलब्ध गराएको छ।
कार्यक्रमका उद्घोषक एवं प्रचार प्रसार समितिका संयोजक मीन विश्वकर्माले सहभागी नेता तथा कार्यकर्ताहरूलाई समयको पाबन्दीबारे जानकारी गराउनु भयो । विश्वकर्माका अनुसार निर्धारित ३ मिनेटको समय सकिएपछि संसद्मा जस्तै गरी माइक काटिनेछ।
धेरै सङ्ख्यामा वक्ताहरू रहेको र सबैका कुरा सुन्नुपर्ने भएकाले कार्यक्रमलाई छरितो र व्यवस्थित बनाउन यस्तो नियम बनाइएको आयोजकले जनाएका छन्। ‘प्रत्येक वक्तालाई ३ मिनेटको समय दिइएको छ, समय सकिए लगत्तै संसद्को अभ्यासमा झैँ माइक स्वतः काटिनेछ,’ विश्वकर्माले कार्यक्रममा जानकारी दिनु भयो ।निवर्तमान सभापति शेरबहादुर देउवाको प्रमुख आतिथ्य र डा. शशांक कोइरालाको संयोजकत्वमा भइरहेको यस भेलामा देशभरबाट उल्लेख्य सङ्ख्यामा नेता–कार्यकर्ताहरूको सहभागिता रहेको छ।
