इलाम,३१ साउन । नेकपा एमालेका अध्यक्ष केपी शर्मा ओलीले आफूलाई अध्यक्ष पदबाट हटाएर देखाउन खुला चुनौती दिनु भएको छ। इलाममा आयोजित एक कार्यक्रमलाई सम्बोधन गर्दै अध्यक्ष ओलीले पार्टीभित्र देखिएको अनुशासनहीनता र अराजकताप्रति कडा आक्रोश व्यक्त गर्नु भएको छ।नेकपा एमालेका अध्यक्ष केपी शर्मा ओलीले आफूलाई अध्यक्ष पदबाट हटाएर देखाउन खुला चुनौती दिनु भएको छ्। इलाममा आयोजित एक कार्यक्रमलाई सम्बोधन गर्दै अध्यक्ष ओलीले पार्टीभित्र देखिएको अनुशासनहीनता र अराजकताप्रति कडा आक्रोश व्यक्त गर्नु भएको छ।
“अध्यक्षलाई हटाउने ! पार्टी सदस्य छ कि छैन ?” ओलीले प्रश्न गर्दै भन्नु भयो, “चिया मगाएको छ, चिया खाएको छ, अध्यक्ष हटाउने कुरा गरेको छ। कहिले हो हटाउने ? हटाइदेऊ न त, ढिलो भयो भने छिटो हटाऊ।” उहाँले पार्टी कार्यालयको क्यान्टिनमा बसेर ‘आभारा’हरूले अध्यक्ष हटाउने ख्याल–ठट्टा गरिरहेको टिप्पणी गर्नु भयो।
आफूविरुद्ध चलिरहेको हस्ताक्षर अभियानप्रति लक्षित गर्दै ओलीले यसमा कुनै दम नभएको दाबी गर्नु भयो। विधान र महाधिवेशनको प्रक्रिया मिचेर गरिने यस्ता गतिविधि बेकार रहेको उहाँको भनाइ छ। “कोही हस्ताक्षर गर्दै हिँडेका छन्, यसको पछाडि केही दम छैन,” ओलीले थपे, “न पार्टीको तरिका छ, न विधान। अस्ति भर्खर महाधिवेशन भएको थियो, आफैँ पनि सहभागी भएको होला, के मजाक हो यो ?”
विरोधी शक्तिहरूले पार्टीमाथि तीव्र प्रहार गरिरहेका बेला एकजुट भएर सामना गर्नुको साटो आन्तरिक कलहमा लाग्नु गलत भएको ओलीले बताउनु भयो। पार्टीलाई झेल्न मुस्किल भइरहेका बेला ‘अध्यक्ष हटाउँछु’ भन्नुको कुनै अर्थ नरहेको भन्दै उहाँले सबैलाई एकताबद्ध हुन आग्रह गर्नु भयो।
