इलाम,३१ साउन । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले सरकारको अनुभवहीनता र अदूरदर्शी कार्यशैलीका कारण मुलुक बर्बादीतर्फ धकेलिएको आरोप लगाउनुभएको छ।इलाममा आयोजित लोकतान्त्रिक आदिवासी जनजाति महासंघ नेपालको केन्द्रीय कमिटी बैठकलाई सम्बोधन गर्दै अध्यक्ष ओलीले राज्य सञ्चालनका लागि आवश्यक ज्ञान, सीप र दक्षता नयाँ भनिएका राजनीतिक शक्तिहरूसँग नभएको दाबी गर्नुभएको छ।
खाना पकाउन नजान्नेलाई भान्साको जिम्मेवारी दिएजस्तै अनुभवहीन नेतृत्वले देश चलाउँदा संकट निम्तिएको टिप्पणी गर्दै उहाँले भन्नुभयो, “शासन सञ्चालन ज्ञान र क्षमताको विषय हो। जानेकाले गर्ने ठाउँमा अनुभवहीन व्यक्तिलाई जिम्मेवारी दिँदा देशले ठूलो क्षति व्यहोर्नुपर्छ।”
राष्ट्रिय राजनीति र प्रशासनमा सक्षम नेतृत्वको अभावमा बेथिति बढेको उल्लेख गर्दै अध्यक्ष ओलीले वर्तमान अवस्थामा संविधानको समेत उल्लंघन भइरहेको दाबी गर्नुभयो। प्रतिनिधि सभाको कार्यकाल बाँकी छँदै असंवैधानिक रूपमा विघटन गरिएको आरोप लगाउँदै उहाँले यसको जवाफ जनताले खोज्नुपर्ने बताउनुभयो।
संविधानको रक्षा र मुलुकको समृद्धिका लागि अनुभवी नेतृत्वको विकल्प नभएको स्पष्ट पार्दै अध्यक्ष ओलीले सचेत भएर भूमिका निर्वाह गर्न पार्टी पंक्तिलाई निर्देशन दिनुभयो।
