काठमाडौं ,१ भदौं । वैदेशिक रोजगार व्यवसायीले अघि सारेका १५ बुँदे माग सम्बोधन गर्न युवा, श्रम तथा रोजगार मन्त्रालय सकारात्मक देखिएपछि व्यवसायीले आन्दोलनका सबै कार्यक्रम फिर्ता लिएका छन्।
सोमबार मन्त्रालयमा भएको वार्तामा व्यवसायीका माग ४५ दिनभित्र सम्बोधन गर्ने सहमति भएको नेपाल वैदेशिक रोजगार व्यवसायी संघका महासचिव हरि डाँगीले जानकारी दिनुभयो। सहमतिसँगै मंगलबारदेखि म्यानपावर कम्पनीहरूले कार्यालय सञ्चालन गरी वैदेशिक रोजगारीमा श्रमिक पठाउने प्रक्रिया पुनः सुरु गर्ने भएका छन्।
व्यवसायीले सेवा शुल्क निर्धारण, वैदेशिक रोजगार विभागबाट भएका कारबाही फिर्तालगायत १५ बुँदे माग राख्दै आन्दोलन घोषणा गरेका थिए।
मन्त्रालयका अनुसार अधिकांश माग नीतिगत विषयसँग सम्बन्धित रहेकाले वैदेशिक रोजगार ऐन तथा नियमावली संशोधनमार्फत सम्बोधन गर्ने सहमति भएको छ। प्रशासनिक प्रकृतिका समस्या भने सम्बन्धित निकायमार्फत समाधान गर्ने प्रक्रिया अघि बढाइने मन्त्रालयले जनाएको छ।
