मकवानपुर , १ भदौ । एमालेले सरकारलाई दिएको समर्थन गत साउन ६ मा फिर्ता लिएपछि अल्पमतमा परेका बागमती प्रदेशका मुख्यमन्त्री इन्द्रबहादुर बानियाँले सोमबार राजीनामा दिने तयारीमा रहेको बताइएको छ । त्यसो त उनले विश्वासको मत लिनका लागि सोमबार दिउँसो १ बजे प्रदेशसभा आह्वान गरेका छन् । तर मुख्यमन्त्री बानियाँले सभालाई सम्बोधन गरेपछि विश्वासको मत विभाजनमा जानुअघि नै प्रदेश प्रमुखसमक्ष राजीनामा बुझाउने तयारीमा रहेको स्रोतको दाबी छ ।
१ सय ४ सदस्यीय प्रदेशसभामा सरकार गठनका लागि कम्तिमा ५३ सांसदको समर्थन आवश्यक पर्छ । बानियाँले राजीनामा दिएपछि बागमतीमा नयाँ सरकार गठनको प्रक्रिया अघि बढ्नेछ । बागमती प्रदेशमा एमाले र नेकपा संयुक्त सरकार गठनको तयारीमा जुटेका छन् । सोही अनुरुप एमालेले मंगलबार बिहान ११ बजेका लागि संसदीय दलको बैठक बोलाएको सचिवालयले जनाएको छ ।
बैठकले दलको नेतामा पूर्व स्वास्थ्य मन्त्री किरण थापालाई अघि सार्ने स्रोतले जनाएको छ । एमाले अध्यक्ष केपी ओलीले यसअघि नै दलको नेता जेएन थपलियालाई हटाउन निर्देशन दिएका थिए । अध्यक्ष ओलीकै निर्देशनमा थापालाई दलको नेता बनाउन लागिएको बुझिएको छ ।थपलियाविरुद्ध १८ जना एमाले सांसदले सचिवालयमा अवश्विासको प्रस्ताव समेत दर्ता गराइसकेका छन् । बैठकले दलको नेता टुंगो लगाएपछि मुख्यमन्त्री दाबीको प्रक्रिया अघि बढाउने एमालेको तयारी रहेको छ ।
