विराटनगर ,१ भदौं । कोशी प्रदेशका मुख्यमन्त्री हिक्मतकुमार कार्कीले मन्त्रिपरिषद् विस्तार गर्दै मन्त्रीहरूको कार्यविभाजन टुङ्ग्याउनुभएको छ। एमाले र नेकपाबीच प्रदेश सरकारमा सहकार्य गर्ने सहमति भएसँगै शनिबार ११ सदस्यीय मन्त्रिमण्डलले पूर्णता पाएको हो।
नयाँ मन्त्रिमण्डलमा मुख्यमन्त्रीसहित ९ मन्त्री र २ राज्यमन्त्री छन्। यसपटक महिला सहभागितालाई समेत प्राथमिकता दिइएको छ। ११ सदस्यीय मन्त्रिमण्डलमा ३ जना महिला सहभागी छन्।
नेकपाबाट खिनु लङ्वा लिम्बूलाई पर्यटन, वन तथा वातावरण र गीता तिम्सिनालाई सामाजिक विकास मन्त्रालयको जिम्मेवारी दिइएको छ। सपना दर्जीलाई भौतिक पूर्वाधार विकास राज्यमन्त्रीको जिम्मेवारी दिइएको छ।
यस्तै, एमालेबाट इन्द्रमणि पराजुलीले स्वास्थ्य तथा रामप्रसाद महतोले उद्योग, कृषि तथा सहकारी मन्त्रालयको जिम्मेवारी पाउनुभएको छ।
नयाँ कार्यविभाजनअनुसार जीवन आचार्यले भौतिक पूर्वाधार विकास, तिलचन पाठकले खानेपानी, सिँचाइ तथा ऊर्जा, गोम्बु शेर्पाले आन्तरिक मामिला तथा कानून र विदुरकुमार लिङ्थेपले आर्थिक मामिला तथा योजना मन्त्रालय सम्हाल्नुहुनेछ।
उमाकान्त गौतमलाई स्वास्थ्य राज्यमन्त्रीको जिम्मेवारी दिइएको छ।
नवनियुक्त मन्त्रीहरूलाई शनिबार प्रदेश प्रमुख पर्शुराम खापुङ्ले तथा राज्यमन्त्रीहरूलाई मुख्यमन्त्री हिक्मतकुमार कार्कीले पद तथा गोपनीयताको शपथ गराउनुभएको छ। सत्ता साझेदार दलहरूको सहभागितासँगै कोशी प्रदेश सरकार पूर्ण भएको छ।
