काठमाडौं ,१ भदौं। राष्ट्रिय स्वतन्त्र पार्टीका सांसद राजिव खत्रीले भूमिहीनलाई अधिकार दिनुपर्ने र निराशा फैलाउने भाष्य निर्माण गर्न नहुने बताउनु भएको छ ।
सोमबार प्रतिनिधिसभाको बैठकमा बोल्दै उहाँले मध्यपुर ठिमी–८ मा ४२१ जना सुकुम्बासीलाई जग्गाधनी दर्ता प्रमाणपत्र वितरण गरिएको उल्लेख गर्दै सरकारको भूमिहीनसम्बन्धी कामलाई सकारात्मक रूपमा लिनुपर्ने बताउनु भयो।
उहाँले भन्नु भयो, ‘एउटा हातमा लालपुर्जा थियो, अर्को हातमा नागरिकको मृत्युको खबर। यो विरोधाभासले हामीलाई गम्भीर प्रश्न सोध्छ ,सरकार भूमिहीनका लागि काम गर्दैछ भने ती कामको आशा प्रत्येक भूमिहीनसम्म किन पुग्न सकेन ?’
खत्रीले थापाथलीको सुकुम्बासी बस्ती भत्काएपछि बोडेस्थित होल्डिङ सेन्टरमा बस्दै आएका ५७ वर्षीय हिरालाल पासवान मृत भेटिएको घटनालाई दुःखद भएको बताउनु भयो।
उहाँले झापा, बर्दिया, चितवन र भक्तपुरलगायतका क्षेत्रमा दशकौँदेखि अल्झिएको भूमिहीनको समस्या समाधानतर्फ सरकारले काम गरिरहेको उल्लेख गर्नुभयो।
‘आलोचना गरौं, कमजोरी देखाऔं, सरकारलाई खबरदारी गरौं, तर केही पनि भएको छैन भन्ने झुटो भाष्य निर्माण गरेर निराशाको आगो नझोसौं,’ उहाँले भन्नु भयो, ‘हामीलाई निराशा होइन, भरोसा चाहिएको छ ।’
खत्रीले भूमिहीनलाई अधिकारको बाटो देखाउँदै आशा जगाउने राजनीति आवश्यक रहेको बताए । ‘हामी भूमिहीनलाई अधिकार दिऔं, निराशा होइन। प्रश्न गरौं, तर आशा पनि जगाऔं,’ उहाँले भन्नु भयो।
