काठमाडौं ,२ भदौ । फूलको आँखामा फूलै संसार बोलको हिट गीतकी गायिका आनी छोइङ डोल्माले दिवंगत दुर्गालाल श्रेष्ठकै गीतका कारण आफू विश्वभर परिचित भएको प्रतिक्रिया दिनु भएको छ ।संगीतज्ञ र कविका रुपमा परिचित श्रेष्ठले नै रचना गर्नुभएको फूलको आँखामा फूलै संसार बोलको गीतमा आफूले स्वर दिन पाएको र सोही गीतले विश्वमा चिनाएको उहाँको भनाइ थियो ।९३ वर्षको उमेरमा आइतबार राति बूढानीलकण्ठस्थित निवासमा निधन हुनुभएका श्रेष्ठसँग आफूले ६० वटाजति गीतमा काम गरेको पनि आनी छोइङले बताउनु भयो।
‘यो गीत जहाँ जस्तो अवस्थामा हिडेपनि गुन्जिन्छ । सबैले इन्जोइ लिइरहेका हुन्छन् । धेरैका लागि ज्ञानवद्र्धक गीत बनेको छ । हरेक घरका अभिभावकहरुले पनि आफ्ना बच्चाहरुलाई यही गीत गाउन प्रेरित गरिरहेका छन् । सोही गीतले आज मलाई विश्वले चिनेको छ,’ उहाँले भन्नु भयो।श्रेष्ठका गीतहरु सरल भाका र शब्दमा हुने भएकाले सबैले मन पराउने गरेको उहाँले सुनाउनु भयो ।
आनी छोइङले आफ्नो फेसबुक पेजमा लेख्नु भएको छ्,‘मेरो जीवनको एक अत्यन्तै अमूल्य व्यक्तिको निधनले मलाई गहिरो दुःख लागेको छ । हाम्रा अति प्रिय र आदरणीय दुर्गा लाल श्रेष्ठ ज्यू, नेपाली साहित्यका एक अति नै प्रिय र कहिल्यै अभाव पूर्ति गर्न नसकिने व्यक्तित्व हुनुहुन्थ्यो, साथै मेरो जीवन र हाम्रो राष्ट्रको लागि एक अमूल्य निधि हुनुहुन्थ्यो ।
उहाँ ‘फूलको आँखामा’ र मेरा धेरै मनपर्ने नेपाली गीतहरू पछाडिको काव्यात्मक हृदय हुनुहुन्थ्यो। कविता, गीत र बालसाहित्य मार्फत उहाँले दिनुभएको दशकौँको योगदानलाई नेपाली जनमानसका कैयौँ पुस्ताले गहिरोसँग सँगालेर राख्नेछन्। उहाँको परिवार र प्रियजनहरूप्रति मेरो गहिरो समवेदना छ। मेरो जीवनमा उहाँका सुन्दर गीतहरूको आशीर्वाद प्राप्त भएकोमा म सदैव आभारी रहनेछु ।’श्रेष्ठको मंगलबार दिउँसो काठमाडौंको शोभा भगवतीमा अन्तिम संस्कार गरिने परिवार स्रोतले जानकारी दिएको छ ।
