धरान/विभागीय टिम त्रिभुवन आर्मी क्लब बाह्रौं इटहरी गोल्डकपको उपाधि नजिक पुगेको छ ।
झापाको रोलिङ क्लबलाई २–१ गोलअन्तरले हराउँदै उपाधि होडमा पुगेको हो । इटहरी रङ्गशालामा बुधबार सम्पन्न पहिलो सेमिफाइनल खेलमा आर्मीका टेकबहादुर बुढाथोकी र सन्तोष तामाङले गोल गरे ।
पहिलो हाफ बराबरी खेलेको आर्मीले उत्तराद्र्धको ६ मिनेट नबित्दै टेकबहादुर बुढाथोकीले गोल गर्दै खाता खोले । सन्तोषले भने खेलको इन्जुरी समयमा गोल गर्दै २–० को स्पष्ट अग्रता बनाए पनि अतिरिक्ति समयमा रोलिङका विदेशी खेलाडी अजय मार्टिनले सान्त्वना गोल गरे । खेलको म्यान अफ दी म्याच आर्मीका टेकबहादुर घोषित हुँदै नगद १० हजार रुपैयाँ पाए ।
साविक विजेता आर्मीले आज (बिहीबार) हुने मनाङ मस्र्याङ्दी क्लब र सगरमाथा फुटबल क्लब मोरङबीच हुने अन्तिम सेमिफाइन विजेतासँग भिडन्त गर्नेछ ।
शनिबार हुने फाइनल खेलको विजेताले नगद ७ लाख रुपैयाँ पाउनेछ भने उपविजेताले नगद ३ लाख ५० हजार रुपैयाँ पाउने आयोजक राष्ट्रिय जागृति क्लब इटहरीले जनाएको छ । त्यस्तै व्यक्तिगत पुरस्कारहरू पनि पाउने जनाइएको छ ।
