काठमाडौं,११ भदौ । रसुवाका विभिन्न जोखिमपूर्ण क्षेत्रमा फसेका ११ जना भारतीय नागरिकसहित कुल ९९ जनाको आज सकुशल उद्धार गरिएको छ । जिल्लाको उत्तरी सीमावर्ती क्षेत्र टिमुरे, स्याफ्रुबेँसी, धुञ्चे तथा उत्तरगया गाउँपालिका लगायतका स्थानहरूबाट उनीहरूलाई सुरक्षित स्थानमा निकालिएको हो ।
उद्धार गरिएकाहरूमा ८८ जना नेपाली र ११ जना भारतीय नागरिक रहेका छन् । सीमा क्षेत्र टिमुरेमा रोकिएका भारतीय नागरिकहरू थिरुमा भालन, बलानी यापन, रत्न कुमार, रणनागा सवाई, रधु नार्दन, सिमारन्जन, नभुकविर दोष, मारन गोविन्दा स्पनु, सत्याई धखम, विजय बखु र पन्गा सावईको उद्धार गरिएको छ ।
त्यसैगरी नेपाली नागरिकहरूतर्फ रसुवा, सिन्धुपाल्चोक र नुवाकोटका स्थानीय बासिन्दा तथा विभिन्न कामका सिलसिलामा त्यहाँ पुगेका नागरिकहरूको उद्धार भएको छ । उद्धार टोलीले ४ वर्षीय बालक अनमोल शाही, ८ वर्षीय सुवास मल्ल तथा १२ वर्षीया दीक्षा मल्लसहित बालबालिका, महिला तथा ७३ वर्षसम्मका वृद्धवृद्धाहरूलाई सुरक्षित रूपमा स्थानान्तरण गरेको छ । उद्धार गरिएका सम्पूर्ण नागरिकहरूलाई सुरक्षित आश्रयस्थलमा राखी आवश्यक समन्वय भइरहेको छ ।
