काठमाडौं, १२ भदौ । पहिरोका कारण बनेको तालको जलस्तर बढ्दै गएपछि चीनले तिब्बतमा जारी उद्धार अभियान स्थगित गरेको छ।
चिनियाँ सरकारी प्रसारक सीसीटीभीका अनुसार ताल भरिएर पानी उद्धार टोली खटिएको क्षेत्रतर्फ बग्न थालेपछि सबै उद्धार टोलीलाई सुरक्षित स्थानमा फर्किन र थप निर्देशनको प्रतीक्षा गर्न भनिएको छ। उद्धार टोलीलाई घटनास्थलबाट करिब एक किलोमिटर टाढा हटाइएको छ।
बुधबार तिब्बतको केरुङ क्षेत्रमा ठूलो पहिरो खसेपछि थुप्रिएको माटो र भग्नावशेषका कारण ताल बनेको थियो। पहिरोमा परी अझै सयौँ मानिस बेपत्ता रहेको बताइएको छ।
निरन्तर वर्षाका कारण आगामी तीन दिनसम्म तालको जलस्तर बढ्ने र सेप्टेम्बर १ आसपास उच्च बिन्दुमा पुग्ने अनुमान गरिएको छ। ताल फुटेमा केरुङ बन्दरगाहसहित तल्लो तटीय क्षेत्रमा थप बाढी र क्षति हुन सक्ने जोखिम रहेको चिनियाँ अधिकारीहरूले बताएका छन्।
सीसीटीभीका अनुसार शुक्रबारसम्म ४९९ चिनियाँ नागरिक र ५५५ विदेशी नागरिकलाई सुरक्षित स्थानमा सारिएको छ। बेपत्ताको खोजीका लागि ड्रोनबाट थ्रीडी मोडलिङ, थर्मल इमेजिङ तथा प्रत्यक्ष खोजी प्रविधि प्रयोग भइरहेको छ।
