काठमाडौं ,१४ भदौ। भोटेकोशी–त्रिशूलीको विनाशकारी बाढीबाट प्रभावित जलविद्युत आयोजनाका सुरुङमा फसेका श्रमिक तथा कर्मचारीको उद्धारका लागि विदेशी उद्धार टोली पनि परिचालन गरिएको छ।
नेपाली सेना, नेपाल प्रहरी र सशस्त्र प्रहरीसँगै आइतबारदेखि भारतीय र चिनियाँ उद्धारकर्मीसमेत खोजी तथा उद्धारमा खटिएका छन्। अहिले रसुवा र नुवाकोटका जलविद्युत आयोजनाभित्र थुनिएका श्रमिक तथा कर्मचारीको उद्धारमा सुरक्षा निकाय केन्द्रित छन्।
नेपाली सेनाका प्रवक्ता सहायक रथी राजाराम बस्नेतका अनुसार त्रिशूली–३ ‘ए’, माथिल्लो त्रिशूली–३ ‘बी’, माथिल्लो त्रिशूली–१ र चिलिमे जलविद्युत आयोजनाका सुरुङमा उद्धारको प्रयास भइरहेको छ। थुनिएका सुरुङ खोल्ने काम भइरहेको उहाँले बताउनु भयो।
त्रिशूली–३ ‘ए’ मा नेपाली सेनासहित ९३ जनाको टोली खटिएको छ। माथिल्लो त्रिशूली–१ मा चिनियाँ उद्धार टोली र नेपाली सेना तथा चिलिमेमा भारतीय उद्धार टोली र नेपाली सेना परिचालन गरिएको छ।
शनिबार ५ जना र आइतबार थप ४ जना चिनियाँ उद्धारकर्मी नेपाल आएका छन्। उनीहरू केरुङ हुँदै रसुवा पुगेका हुन्। भारतबाट शुक्रबार ५ सदस्यीय सुरुङ उद्धार टोली रेकीका लागि आएको थियो भने शनिबार थप १३ सदस्यीय टोली प्रभावित क्षेत्रमा पुगेको छ।
उद्धारमा कठिनाइ भइरहेका आयोजनामा माथिल्लो त्रिशूली–३ ‘बी’ मा १२२ जना, त्रिशूली–३ ‘ए’ मा ४२ जना र चिलिमेमा ८ जना सुरुङभित्र हुनसक्ने आशंका गरिएको छ। त्रिशूली–३ ‘बी’ बाट यसअघि ११ जनाको उद्धार भइसकेको छ।
त्यस्तै, माथिल्लो त्रिशूली–१ मा रहेका ५७६ जनामध्ये अहिलेसम्म २५४ जनाको उद्धार भएको छ भने करिब ३०० जना अझै सुरुङभित्र फसेको आशंका गरिएको छ।
