दमक । १६ भदौ | रसुवास्थित भोटेकोशी नदीमा आएको विनाशकारी बाढीबाट प्रभावित परिवारको सहयोगका लागि दमकमा आयोजना हुने श्रीकृष्ण रथयात्रामा संकलन हुने दान–भेटी राहतका लागि प्रदान गरिने भएको छ।
दमक श्रीकृष्ण रथयात्रा व्यवस्थापन समितिका अध्यक्ष रोहित आचार्यले आज आयोजित पत्रकार सम्मेलनमार्फत रथयात्राका क्रममा संकलन हुने दान–भेटी तथा स्वेच्छिक सहयोग पारदर्शी रूपमा व्यवस्थापन गरी प्रधानमन्त्री दैवी प्रकोप राहत कोषमा जम्मा गर्ने जानकारी दिनुभएको हो।
भोटेकोशी बाढीमा ज्यान गुमाएकाहरूको आत्माको चिरशान्तिको कामना, घाइतेहरूको शीघ्र स्वास्थ्यलाभ तथा अझै सम्पर्कविहीन रहेका व्यक्तिहरूको सकुशल उद्धार र परिवारसँग पुनर्मिलनको कामनासहित यस वर्षको रथयात्रालाई धार्मिक उत्सवसँगै मानव सेवाको अभियानका रूपमा अघि बढाइने अध्यक्ष आचार्यले बताउनुभयो।
रथयात्राका क्रममा विभिन्न स्थानमा आरती तथा प्रार्थना गरिनेछ। हनुमान मन्दिर, जेसी चोक, देवकोटा चोक, पशुपति मन्दिर, शंखधर चोक, भृकुटी चोक, रातो पुल, भानुभक्त चोक, फागुनन्द चोक तथा दमक नगरपालिका अगाडिलगायतका स्थानमा बाढीमा दिवंगत भएकाहरूको आत्मशान्ति, घाइतेको स्वास्थ्यलाभ र बेपत्ताहरूको शीघ्र उद्धारका लागि प्रार्थना गरिने समितिले जनाएको छ।
यस वर्षको रथयात्रामा विगतको तुलनामा नाचगानभन्दा कीर्तन र भक्तिभावलाई प्राथमिकता दिइने भएको छ। विपत्तिमा परेका नागरिकप्रति ऐक्यबद्धता जनाउँदै रथयात्रालाई सद्भाव, सेवा र मानवताको सन्देश दिने कार्यक्रमका रूपमा अघि बढाउने समितिको तयारी छ।
रथयात्रामा ज्येष्ठ नागरिक तथा अशक्त व्यक्तिहरूलाई सहज बनाउन करिब ५० देखि ७० वटा सफारीको व्यवस्था गरिएको छ। रथयात्राको सुरक्षाका लागि सशस्त्र प्रहरी, नेपाल प्रहरी र दमक नगर प्रहरीसँग समन्वय गरिएको छ भने ट्राफिक व्यवस्थापनका लागि ट्राफिक प्रहरी, जीवनचक्र समाज र नगर प्रहरी परिचालन हुनेछन्।
