झापा,१७ भदौ ।झापाका प्रमुख जिल्ला अधिकारी शिवराम गेलालले पदबाट राजीनामा दिनुभएको छ। गेलालले दुई दिनअघि काठमाडौं पुगेर गृहसचिवसमक्ष राजीनामा पत्र बुझाउनु भएको हो। उहाँको राजीनामा भोलिदेखि लागू हुनेछ।
राजीनामा बुझाएर झापा फर्किएका गेलाललाई आज जिल्ला प्रशासन कार्यालयमा औपचारिक कार्यक्रम आयोजना गरी बिदाइ गरिएको छ।
सरकारले निजामती सेवामा कार्यरत जनशक्ति घटाउने उद्देश्यसहित ५५ वर्षमै अनिवार्य अवकाशको व्यवस्था गर्न तयारी अघि बढाएपछि गेलालले राजीनामा दिएको बुझिएको छ।
संघीय मामिला तथा सामान्य प्रशासन मन्त्रालयले तयार पारेको संघीय निजामती विधेयकको मस्यौदामा ५५ वर्ष उमेर पूरा भएका वा ३० वर्ष सेवा अवधि पुगेका कर्मचारीलाई अनिवार्य अवकाश दिने प्रस्ताव गरिएको छ। उक्त मस्यौदा अहिले कानुन मन्त्रालयको रायका लागि पठाइएको छ।
सरकारले पुराना कर्मचारीको संख्या घटाएर निजामती सेवाको जनशक्ति व्यवस्थापन गर्ने उद्देश्यले यस्तो व्यवस्था प्रस्ताव गरेको हो।
प्रस्तावित व्यवस्था संसद्बाट यही रूपमा पारित भएर कार्यान्वयनमा आएमा २०२८ सालअघि जन्मिएका र हाल निजामती सेवामा रहेका कर्मचारीहरू अनिवार्य अवकाशमा जानेछन्।
यही प्रावधान कार्यान्वयनमा आउन सक्ने अवस्थाबीच गेलालले समयअगावै राजीनामा दिएको बुझिएको छ।
