झापा, भदौ १९ । विकास निर्माणसंगै सामाजिक काममा अग्रसर बिर्तामोड ८ स्थित भेलागुडी विश्रान्तिघाट निर्माण समितिले आयोजना गरेको निःशुल्क आँखा शिविरबाट धेरैजना लाभान्वित भएका छन् ।बिर्तामोड नगरपालिका ८ नं वडा कार्यालयको विशेष पहल र दृष्टि आँखा अस्पताल बिर्तामोडको प्राविधिक सहयोगमा हिजो विश्रान्तिघाट परिसरमा आयोजित शिविरमा करिव ३५० जना विरामीले सेवा लिएको आयोजक समितिका सचिव मदन अधिकारीले बताउनुभयो । तीमध्ये १२ जनामा मोतिया विन्दुको समस्या पाइएको र उनीहरुलाई सहुलियत रुपमा शल्यक्रिया गरिने उहाले जानकारी दिनुभयो ।
शिविरमा आँखाको उपचारसंगै नाक, कान र घाँटी सम्बन्धी पनि निःशुल्क चेकजाँच गरिएको वडाध्यक्ष अजय कार्कीले बताउनुभयो । उहाले भेलागुडी विश्रान्तिघाटलाई धार्मिक एवं पर्यटकीय स्थलको रुपमा विकास गरिएको बताउँदै घाट निर्माणपछि पार्कको काम तीब्र गतिमा भइरहेको जानकारी दिनुभयो ।दृष्टि आँखा अस्पतालका बजार व्यवस्थापक सूर्य रिमालले सहजीकरण गर्नुभएको शिविरमा सो अस्पतालका डा. विरेन्द्रप्रसाद साह , डा. कौशलकिशोर साह,डा. चन्दना साह,सुजन केरुङ, शिक्षा गजमेर, सरोज बस्नेतलगायतको टीमले स्वास्थ्य जाँच गर्नुभएको थियो ।
