दमक, २१ भदौ । दमकको हंसे दुम्से सामुदायिक वन उपभोक्ता समितिको अध्यक्षमा योगराज दंगाल निर्वाचित हुनुभएको छ।
राप्रपा दमक–२ का वडाध्यक्षसमेत रहनुभएका दंगालले नेपाली कांग्रेसका वडा सभापतिसमेत रहनुभएका भागवत दुलाललाई पराजित गर्दै अध्यक्षमा निर्वाचित हुनुभएको हो।
निर्वाचनमा दंगालले ७५ मत प्राप्त गर्दा पराजित दुलालले ४४ मत प्राप्त गर्नुभयो। दुलाल यसअघि करिब १० वर्षदेखि यही समितिको कार्यसमिति सदस्यका रूपमा रहेर काम गरिसक्नुभएको थियो।
दमक फन पार्कका सञ्चालकसमेत रहनुभएका दंगाललाई राप्रपासहित नेकपा एमाले, नेकपा तथा अन्य दलको समेत समर्थन रहेको थियो। दुलाल भने नेपाली कांग्रेसको तर्फबाट समर्थनमा उम्मेदवार बन्नुभएको थियो।
यस्तै, उपाध्यक्षमा नन्दीकेश्वर दंगाल निर्वाचित हुनुभएको छ। दंगालले ६३ मत प्राप्त गर्दा उहाँका निकटतम प्रतिस्पर्धी चन्द्रवीर विश्वकर्माले ५७ मत प्राप्त गर्नुभयो। ६ मतको अन्तरले दंगाल विजयी हुनुभएको हो।
सचिवमा अध्यक्ष दंगालकै प्यानलका उम्मेदवार शुष्मा देवी अधिकारी ७१ मत प्राप्त गरी विजयी हुनुभयो। उहाँकी प्रतिस्पर्धी टुका कुमारी बस्नेत अधिकारीले ४८ मत प्राप्त गर्नुभयो।
उपसचिवमा पनि दंगालकै प्यानलका मनोज बस्नेत विजयी हुनुभएको छ। उहाँले ४४ मत प्राप्त गर्दा निकटतम प्रतिस्पर्धीहरू चुडेम्बर कुमार खड्का र टंकप्रसाद सापकोटा क्रमशः ३९ र ३७ मत प्राप्त गर्नुभयो।
त्यसैगरी, कोषाध्यक्षमा अध्यक्ष दंगालकै प्यानलका मायादेवी कोइराला (सिग्देल) विजयी हुनुभएको छ। उहाँले ७० मत प्राप्त गर्दा निकटतम प्रतिस्पर्धी कल्पना राईले ५१ मत प्राप्त गर्नुभयो।
लेखा समितिको संयोजकमा ठाकुरप्रसाद लुइँटेल ६४ मत प्राप्त गरी विजयी हुनुभयो। उहाँका प्रतिस्पर्धी श्यामप्रसाद आचार्यले ५२ मत प्राप्त गर्नुभयो।
हंसे दुम्से सामुदायिक वनका करिब १ हजार ९३ घरधुरी उपभोक्ता सदस्यबाट १२६ जना परिषद् सदस्यले निर्वाचन प्रक्रियामा सहभागिता जनाएका थिए।
