काठमाडौं ,२६ भदौ । नेपाली कांग्रेसका सभापति गगनकुमार थापाले सम्माननीय प्रधानमन्त्री बालेन शाहलाई निजी क्षेत्र हेर्नै मन नपर्ने टिप्पणी गर्नुभएको छ ।गिरिजाप्रसाद कोइराला फाउन्डेसनद्वारा शुक्रबार आयोजित संस्थाको ‘समीक्षा तथा भावी योजना’ विषयक कार्यक्रममा उहाँले यस्तो टिप्पणी गर्नुभएको हो । ‘अहिलेको प्रधानमन्त्रीलाई निजी क्षेत्र हेर्नै मन पर्दैन,’ सभापति थापाले भन्नुभयो, ‘अहिलेको प्रधानमन्त्री मेरो आफ्नो बुझाइमा ही हेट्स प्राइभेट सेक्टर ।’
उहाँले प्रधानमन्त्री शाहका बारेमा आफूले अनुमानका भरमा टिप्पणी नगरेको स्पष्ट पार्नुभयो । ‘मैले अनुमानको आधारमा भनेको होइन,’ उहाँले भन्नुभयो, ‘उहाँका पछिल्ला कतिपय अभिव्यक्तिहरू, कतिपय उहाँका निर्णयहरू हेर्दा यस्तो देखिन्छ ।’सभापति थापाले दुग्ध विकास संस्थान, हेटौंडा कपडा कारखाना र नेपाल औषधि लिमिटेडबारे सरकारले गरेका निर्णयहरूलाई आधारका रूपमा प्रस्तुत गर्नुभयो । ‘ती कारखाना चलुन्, मुनाफा कमाउन्, मेरो शुभेच्छा छ,’ उहाँले भन्नुभयो, ‘त्यसका बारेमा टिप्पणी होइन ।’
