काठमाडौं , भदौ २६। राष्ट्रिय स्वतन्त्र पार्टीकी सांसद तोसिमा कार्कीले सप्तरीको गजेन्द्र नारायण सिंह अस्पताल नजिकै सडकपेटीमा महिलाले बच्चा जन्माउनुपरेको घटनाले नेपालको मातृत्व सेवा र समग्र स्वास्थ्य प्रणालीमाथि गम्भीर प्रश्न उठाएको बताउनुभएको छ
।शुक्रबार बसेको प्रतिनिधिसभाको बैठकमा बोल्दै कार्कीले नेपालमा संस्थागत प्रसूति निःशुल्क रहेको, आमा सुरक्षा कार्यक्रम सञ्चालनमा रहेको र मातृ मृत्युदर घटिरहेको भन्दै गर्व गरिए पनि व्यवहारमा नागरिकले पाउने स्वास्थ्य सेवामा ठूलो समस्या रहेको बताउनुभयो। उहाले भन्नुभयो, ‘हामी गर्व गर्ने गर्छौँ, नेपालमा संस्थागत प्रसूति निःशुल्क छ, आमा सुरक्षा कार्यक्रम छ, मातृ मृत्युदर घटिरहेको छ। यहाँसम्म कि यातायात प्रोत्साहन खर्च पनि दिइन्छ। तर गजेन्द्र नारायण सिंह अस्पताल, त्यो पनि सङ्घीय सरकारी अस्पतालको नजिकै सडकपेटीमा एउटी आमाले बच्चा जन्माउनुपरेको दृश्यले हाम्रो मातृत्व सेवा र समग्र स्वास्थ्य प्रणालीको रिपोर्ट कार्ड हामीसामु ल्याइदिएको छ।’संविधानमा स्वास्थ्यको हक, सुरक्षित मातृत्व र प्रजनन स्वास्थ्यको हक सुनिश्चित गरिए पनि कागजमा लेखिएको निःशुल्क सेवा र नागरिकले व्यवहारमा पाउने सेवाबीच ठूलो दूरी रहेको उहाले बताउनुभयो।
प्रसव पीडामा अस्पताल पुग्ने महिलाको तत्काल ट्रायज र इमर्जेन्सी क्लिनिकल असेसमेन्ट सुरु गर्नुपर्ने भन्दै उहाले मटर्नल फिटल इभ्यालुएसनसमेत तत्काल गर्नुपर्ने बताउनुभयो। प्रसव पीडामा अस्पताल पुगेकी महिलालाई तत्काल भर्ना गरेर निरन्तर निगरानीमा राख्नुपर्ने उहाको भनाइ थियो।अस्पतालमा भर्ना भएकी बिरामी सम्पर्कविहीन हुँदा खोजी नगर्नु र परिवारलाई सम्पर्क नगर्नु गम्भीर लापरबाही भएको उहाले प्रश्न उठाउनुभएको छ ।कार्कीले प्रसवका लागि अस्पताल पुगेकी महिलालाई सुरक्षित रूपमा भर्ना गर्ने, आवश्यक परे ट्रान्सपोर्ट गर्ने र नियमित निगरानी गर्ने जिम्मेवारी अस्पतालकै हुनुपर्ने बताउनुभयो। बिरामी बेडमा नभेटिएपछि खोजी गर्ने र फारममा राखिएको फोन नम्बरमार्फत तत्काल सम्पर्क गर्नुपर्ने उहाको भनाइ थियो।ब्लड टेस्टका लागि पैसा नभएको अवस्थामा समेत सामाजिक सेवा एकाइ र आमा सुरक्षा कार्यक्रम तत्काल सक्रिय हुनुपर्ने उहाले बताउनुभयो। आमा सुरक्षा कार्यक्रम बच्चा जन्माउने प्रक्रियामा मात्र सीमित हुन नहुने उहाको भनाइ छ।स्वास्थ्य मन्त्रालयले घटनाबारे अनुसन्धान अघि बढाएको र नेपाल मेडिकल काउन्सिलको टोलीसमेत पुगेको उल्लेख गर्दै कार्कीले छानबिन दोषी पहिचान र कारबाहीमा मात्र सीमित हुन नहुने बताउनुभयो। भविष्यमा यस्ता घटना दोहोरिन नदिन समाधानका उपायसमेत अघि बढाउनुपर्ने उहाको जोड थियो।त्यस्तै, आमा सुरक्षा कार्यक्रमलाई ‘कम्प्लिट मटर्नल प्याकेज’का रूपमा व्यवस्थित गर्नुपर्ने उनले माग गरिन्।
प्रसूति तथा शिशु सेवासँगै आवश्यक जाँच, औषधि, उपचार, भिडियो एक्सरे, सुत्केरी सेवा र परिवार नियोजनसम्मका सेवामा कार्यक्रमले समेट्नुपर्ने उहाको भनाइ थियो।कतिपय अस्पतालले औषधि निःशुल्क नदिने तथा भिडियो एक्सरेलगायतका सेवामा शुल्क लिने गरेको भन्दै उनले यस्तो अवस्थामा आमा सुरक्षा कार्यक्रम प्रभावकारी हुन नसक्ने बताउनुभयो।उहाले प्रत्येक अस्पतालमा सामाजिक सेवा एकाइलाई २४ सै घण्टा सक्रिय राख्नसमेत माग गर्नुभयो।गरिब बिरामी आफैँले पैसा जुटाउने वा सहयोग खोज्ने अवस्था अन्त्य गरी अस्पतालले नै आर्थिक रूपमा कमजोर बिरामी पहिचान गरेर आवश्यक सहयोग उपलब्ध गराउने प्रणाली विकास गर्नुपर्ने उहाको भनाइ थियो।कार्कीले प्रत्येक अस्पतालमा विस्तृत ‘मटर्नल केयर अडिट’को व्यवस्था गरी त्यसको नियमित नियमन र आवश्यक कारबाही गर्नुपर्ने मागसमेत गर्नुभयो। बिरामी कति आए, कति सुत्केरी भए र कति जनाको अपरेसन भयो भन्ने तथ्यांक मात्र नभई बिरामी कुन समयमा अस्पताल आइपुग्यो, ट्रायज भयो कि भएन, उपचार प्रक्रिया कसरी अघि बढ्यो भन्ने विषयसमेत अभिलेख र मूल्यांकनमा समेटिनुपर्ने उहाले बताउनुभयो।
