दमक, २६ भदौ । झापाको दमकबाट पाँचथरसम्म खाना पकाउने ग्यासको अवैध निकासी हुने गरेको खुलेको छ ।
दमक नगरपालिका–१ मा सञ्चालित मुना स्टोर्सले स्वीकृत परिमाणभन्दा बढी ग्यास बिना रेकर्ड बिक्री वितरण गरेको इलाका प्रशासन कार्यालय दमकको बजार अनुगमनका क्रममा फेला परेको हो ।
प्रशासनका प्रशासन शाखा अधिकृत अधिकृत सुरेन्द्र दाहालका अनुसार स्टोर्सले भदौ १४ गते १८० र भदौ २२ गते ३६० गरी जम्मा ५४० थान कन्काई ग्यास प्राप्त गरेको देखिन्छ । तर, अनुगमनका दिनसम्म जम्मा १५० थान ग्यासको मात्रै बिक्री रेकर्ड भेटिएको छ ।
यस हिसाबले ३९० थान ग्यासको आधिकारिक बिक्री रेकर्ड छैन ।
अनुगमन टोली पुग्दा स्टोर्सको गोदाममा जम्मा दुईवटा मात्रै भरिएका सिलिण्डर भेटिएका थिए । तर, करिब २५० वटा खाली सिलिण्डर गोदाममा रहेको प्रशासनले जनाएको छ ।
अनुगमनबाट स्थानीय बजारमा बिक्रीका लागि ल्याइएको ग्यास बिना रेकर्ड जिल्ला बाहिरसमेत पठाउने गरेको खुलेको छ ।
प्राप्त विवरणअनुसार मुना स्टोर्सबाट पाँचथरको तुम्बेवा गाउँपालिकाका जीवन कार्कीलाई २६, टीका भट्टराईलाई १० र अस्मिता राईलाई ६ गरी ४२ थान ग्यास पठाइएको भेटिएको छ ।
यसले दमकमा ल्याइएको ग्यासको ठूलो हिस्सा कहाँ र कसरी बिक्री भयो भन्ने प्रश्नसमेत उठाएको छ । प्रशासनले ग्यासको कारोबारमा देखिएको अनियमितता र जिल्ला बाहिर भएको अवैध निकासीबारे थप कानुनी कारबाहीको प्रक्रिया अघि बढाएको जनाएको छ।
हेलो सरकारबाट उजुरीका आधारमा इलाका प्रशासनले अनुगमन गरेको हो । २४ घण्टा भीत्रमा आएको गुनासोका आधारमा अनुगन समते गरिएको प्रशासन कार्यालयले जानाएको छ ।
यसरी बिना रेकर्ड र अन्तर जील्ला समेत बिक्रि गरेको भन्दै मुना स्टोर्सलाई कार्वाहिको प्रकृया समेत सुरु गरिएको प्रशासन शाखा प्रमुख दाहालले जानकारी दिनुभयो ।
