काठमाडौं ,२८ भदौ। प्रहरी अतिरिक्त महानिरीक्षक सुशील सिंह राठौरले काठमाडौंलाई सुरक्षित, भयमुक्त र व्यवस्थित बनाउन सकिन्छ भनेर एउटै उद्देश्यका साथ परिचालित भएको बताउनु भएको छ ।
महानगर प्रहरी बलको ३४औँ वार्षिकोत्सवका अवसरमा बोल्दै महानिरीक्षक राठौरले सर्वसाधारण र सुरक्षाकर्मी सबैको एउटै उद्देश्य काठमाडौंलाई सुरक्षित, भयमुक्त र व्यवस्थित बनाउनु रहेको बताउनु भयो ।
उहाँले भन्नुभयो,‘सर्वसाधारण र सबै सुरक्षाकर्मीहरू काठमाडौँलाई कसरी सुरक्षित र भयरहित बनाउन सकिन्छ, कसरी व्यवस्थित बनाउन सकिन्छ भन्ने एउटै उद्देश्यका साथ परिचालित भएका छौँ ।’
महानगरपालिकालाई सुरक्षित र व्यवस्थित बनाउन महानगर प्रहरी बलले गरिरहेको प्रयासको प्रशंसा गर्दै उहाँले बलको कार्यसम्पादनप्रति आफू उच्च मूल्यांकन गर्ने बताउनु भयो ।
राठौरले सुरक्षाकर्मीले आफ्नो कर्तव्य, राज्यले प्रदान गरेको कानुनी अधिकार तथा जिम्मेवारीबारे स्पष्ट जानकारी राख्नुपर्नेमा जोड दिनुभयो । उहाँले कानुनले दिएको अधिकारको प्रयोग गर्दा कर्तव्य र जिम्मेवारीलाई समेत महत्व दिनुपर्ने बताउनु भयो ।
उहाँले सुरक्षाकर्मीहरू आफ्नो पेसाप्रति अनुशासित, निष्ठावान् र नैतिक भएर अघि बढ्नुपर्ने बताउनु भयो ।
