झापा ,२८ भदौ। जिल्ला प्रशासन कार्यालय झापाले राहदानी र राष्ट्रिय परिचयपत्रका लागि पालो पर्खिरहेका सेवाग्राहीको संख्या शून्यमा झार्ने अभियान थालेको छ। ‘शून्य बाँकी आवेदन अभियान’ अन्तर्गत सार्वजनिक बिदाका दिनसमेत सेवा सञ्चालन गरिने भएको हो।
प्रमुख जिल्ला अधिकारी श्रवणकुमार पोखरेलका अनुसार अनलाइन आवेदन गरी बायोमेट्रिकलगायत प्रक्रियाका लागि पालो पर्खिरहेका सेवाग्राहीलाई असोज १५ गतेसम्म सेवा दिइनेछ।
अभियान अवधिमा कार्यालयले दैनिक बिहान ७ बजेदेखि साँझ ६ बजेसम्म सेवा दिनेछ। सार्वजनिक बिदाका दिन पनि सेवा निरन्तर रहने प्रशासनले जनाएको छ।
राहदानी तथा राष्ट्रिय परिचयपत्र सेवामा सेवाग्राहीको चाप बढेपछि लामो समयदेखि पालो पर्खिरहेका आवेदकलाई छिटो सेवा दिने उद्देश्यले अभियान सञ्चालन गरिएको कार्यालयले जनाएको छ।
प्रशासनले अनलाइन आवेदन गरी पालो पर्खिरहेका सबै सेवाग्राहीलाई अभियान अवधिमा कार्यालयमा उपस्थित हुन आग्रह गरेको छ। सेवा लिन आउँदा आवश्यक सक्कल कागजात अनिवार्य रूपमा ल्याउन समेत अनुरोध गरिएको छ।
