काठमान्डौ , ३१ भदौ । सरकारले सुरक्षित मातृत्व तथा प्रजनन स्वास्थ्य अधिकार ऐन, २०७५ संशोधन गर्न बनेको विधेयक संसद्मा लैजाने तयारी गरेको छ।
प्रस्तावित विधेयकमा आमालाई कम्तीमा ६ महिना र बुबालाई ४२ दिनसम्म तलबसहितको बिदा दिने व्यवस्था गरिएको कानुनमन्त्री सोबिता गौतमले जानकारी दिएकी छन्।
मन्त्री गौतमका अनुसार बदलिँदो जीवनशैली र कामको चापका कारण परिवारमा एक वा दुई सन्तानमै सीमित हुने क्रम बढिरहेको अवस्थामा नवजात शिशुको हेरचाह र परिवारलाई समय दिन अभिभावकलाई पर्याप्त बिदा आवश्यक छ।
बच्चा जन्माउने प्रक्रिया आमासँग जोडिए पनि बच्चा हुर्काउने जिम्मेवारी आमाको मात्र नभई दुवै अभिभावकको साझा जिम्मेवारी भएको मन्त्री गौतमको भनाइ छ।
संशोधन विधेयक मन्त्रिपरिषद्बाट अघि बढाएर संसद्मा पेस गर्ने तयारी भइरहेको छ।
