दमक, ३१ भदौ । झापामा जापानिज इन्सेफ्लाइटिस अर्थात् मस्तिष्क ज्वरोको संक्रमण र यसबाट हुने मृत्युका घटना बढिरहेका छन्। जोखिम न्यूनीकरणका लागि सरकारले असोज ५ गतेदेखि झापाका १५ वटै स्थानीय तहमा विशेष खोप अभियान सञ्चालन गर्दैछ। तर प्रश्न छ, संक्रमणको उच्च जोखिममा रहेको झापाको दमक नगरपालिका अभियानका लागि कति तयार छ?
स्वास्थ्य कार्यालय झापाका अनुसार पछिल्लो विवरणमा जिल्लामा जापानिज इन्सेफ्लाइटिसका १३ संक्रमित भेटिएका छन् भने ६ जनाको मृत्यु भइसकेको छ। मृत्यु हुनेमा चार महिला र दुई पुरुष छन्। यसअघि भदौ २१ गतेसम्म गरिएको परीक्षणमा पन्चनवे जनामा एक्युट इन्सेफ्लाइटिस सिन्ड्रोमका लक्षण देखिँदा १२ जनामा जेई पुष्टि भएको थियो।
संक्रमण र मृत्युदर बढेपछि झापालाई कोशी प्रदेशका उच्च जोखिमयुक्त क्षेत्रमध्ये राख्दै सरकारले पहिलो चरणमा विशेष खोप अभियान सञ्चालन गर्न लागेको हो।असोज ५ देखि १९ गतेसम्म चल्ने अभियानमा झापाका १५ वटै स्थानीय तहका ३० वर्षमाथिका करिब ४ लाख तिरनवे हजार ३ सय १९ नागरिकलाई खोप लगाउने लक्ष्य राखिएको छ।
यही अभियानअन्तर्गत दमक नगरपालिकामा मात्रै ३० वर्षमाथिका छपन्न हजार ७ सय २८ नागरिकलाई खोप लगाउने लक्ष्य राखिएको छ।अभियानलाई प्रभावकारी बनाउन दमकमा पालिका खोप समन्वय समिति तथा सरोकारवालाका लागि अभिमुखीकरण समेत गरिएको छ।
दमकका लागि चुनौती केवल छपन्न हजारभन्दा बढी नागरिकलाई खोप लगाउनु मात्रै होइन। लक्षित सबै नागरिकसम्म सूचना पु¥याउने, खोप केन्द्रमा नागरिकको पहुँच सहज बनाउने र अभियानका क्रममा कुनै लक्षित व्यक्ति छुट्न नदिने विषय पनि उत्तिकै महत्वपूर्ण छन्।झापाका अन्य स्थानीय तहमा प्रत्येक वडामा खोप केन्द्र स्थापना गर्ने तथा महिला स्वास्थ्य स्वयंसेविका र खोपकर्मी परिचालन गर्ने तयारी गरिएको स्वास्थ्य कार्यालयले जनाएको छ। एक स्थानीय तहमा बढीमा सात दिनसम्म खोप सेवा सञ्चालन गर्ने तयारी छ।
अब दमकको तयारी कस्तो छ भन्ने प्रश्नमा नगरपालिकाले आवश्यक समन्वय र सहकार्यसहित अभियान सफल बनाउने जनाएको छ।जापानिज इन्सेफ्लाइटिस लामखुट्टेको टोकाइबाट सर्न सक्ने गम्भीर रोग हो। संक्रमण भएपछि मस्तिष्कमा असर पर्न सक्ने भएकाले जोखिम न्यूनीकरणका लागि खोपसँगै लामखुट्टेको टोकाइबाट बच्ने उपाय पनि महत्वपूर्ण मानिन्छ।स्वास्थ्य अधिकारीहरूले घरवरपर पानी जम्न नदिने, झुल प्रयोग गर्ने तथा विशेषगरी साँझ र बिहान लामखुट्टेको टोकाइबाट जोगिन आग्रह गरेका छन्।
झापामा संक्रमण र मृत्युका घटना बढिरहेका बेला असोज ५ गतेदेखि सुरु हुने अभियानले दमकका छपन्न हजार ७ सय २८ नागरिकलाई समेट्ने लक्ष्य राखेको छ। अब अभियानको सफलता भनेको लक्ष्य घोषणा गर्नुमा होइन, लक्षित नागरिकमध्ये कति जनाले वास्तवमै खोप पाए भन्नेमा निर्भर हुनेछ।
