काठमाडौं, असोज १। रसुवा–भोटेकोशी–त्रिशूली विपद् तथा जलवायु परिवर्तनको सन्दर्भमा संसदीय विशेष समितिको टीओआर बनाउन दलहरूबिच भएको छलफल निश्कर्षविहन भएको छ । बिहीबार सत्तारुढ दल रास्वपा संसदीय दलका उपनेता गणेश पराजुलीको अग्रसरतामा बसेको दलका नेताहरूको छलफलमा विविध विषयमा छलफल भए पनि सहमति हुन नसकेको हो । ‘ संसदीय विशेष समिति कस्तो निर्माण गर्ने, कति समयका लागि हुने र केके काम गर्ने भन्नेमा छलफल भयो तर आज सहमति भएन’, छलफलमा सहभागी एमाले सांसद पद्मा अर्यालले भनिन्, ‘अर्को बैठकमा सहमति जुटाउनेबारे कुराकानी भएको छ ।’
कांग्रेस सांसद निष्कल राईले संसदीय विशेष समिति सानो आकारको बनाउन आफूहरूले प्रस्ताव गरे पनि सत्तारुढ दल रास्वपाको संसद्को उपस्थितिका आधारमा बनाउनुपर्ने बताएको जानकारी दिनुभयो । ‘हामीले ३ महिनाको समिति बनाऔँ, आवश्यक पर्यो भने पछि समय थपौला’, राईले भन्नुभयो , ‘यसमा पक्ष–प्रतिपक्ष भन्दा पनि विपदमा सवै एक हुनुपर्छ ।’ उहाले रास्वपाका तर्फबाट सङ्ख्यात्मक आधारमा समितिको प्रतिनिधित्व हुनुपर्छ भनेकाले निष्कर्षमा पुग्न नसकिएको बताउनुभयो । ‘फाइभ इज टु वानका आधारमा समिति गठन गरौँ भनेर प्रस्ताव गरेका थियौँ । संयोजक पनि ग्राभिटी भएको नेता बसौँ भन्दा उहाँहरूले सङ्ख्यात्मक आधारमा हुनुपर्छ भनेकाले निष्कर्षमा पुगेनौ’, राईको भनाइ छ ।
