दमक ,१ असोज । तपाईंले दैनिक खाने मासु कत्तिको स्वच्छ र सुरक्षित छ? अब दमकमा यसको जवाफ मासु व्यवसायीले अनिवार्य रूपमा दिनुपर्ने भएको छ। दमक नगरपालिकाले तोकेका मापदण्ड पूरा नगरी व्यवसाय सञ्चालन गर्ने मासु पसलमाथि आगामी असोज १५ गतेदेखि कारबाही गर्ने चेतावनी दिएको छ। विशेषगरी दमकको मुख्य बजार क्षेत्र पर्ने वडा नम्बर ६ मा मासु पसलको अनुगमन व्यापक बनाइने वडा अध्यक्ष टेकबहादुर थापाले बताउनुभयो। मासु व्यवसायलाई व्यवस्थित, मर्यादित, सफा र स्वच्छ बनाउने उद्देश्यले मापदण्ड कार्यान्वयनमा कडाइ गर्न लागिएको उहाँले स्पष्ट पार्नुभयो।
मापदण्डअनुसार मासु पसल स्थानीय तहमा दर्ता भएको र आवश्यक खाद्य तथा पशु स्वास्थ्यसम्बन्धी अनुमति लिएको हुनुपर्नेछ। स्वस्थ पशु मात्र वध गर्नुपर्ने, रोगी, मरेको वा शंकास्पद पशुको मासु बिक्री गर्न नहुने तथा वधपूर्व र वधपश्चात् स्वास्थ्य परीक्षणको व्यवस्था गर्नुपर्नेछ। पसल, भुइँ, भित्ता, टेबुल र उपकरण सफा राख्नुपर्ने, रगत तथा पशुजन्य फोहोरको उचित व्यवस्थापन गर्नुपर्ने र झिँगा तथा अन्य कीरा नियन्त्रण गर्नुपर्नेछ। त्यस्तै, मासु भुइँमा राख्न नहुने, धुलो तथा प्रदूषणबाट सुरक्षित राख्नुपर्ने र आवश्यकताअनुसार चिस्यान वा कोल्ड स्टोरेजको व्यवस्था गर्नुपर्ने मापदण्ड छ।
मासु काट्ने व्यक्तिले सफा कपडा, एप्रोन र टोपी वा हेयरनेट लगाउनुपर्नेछ। बासी, कुहिएको वा दुर्गन्धित मासु बिक्री गर्न तथा तौलमा ठगी गर्न पाइने छैन। ग्राहकलाई मासु दिँदा सफा र खाद्य–उपयुक्त प्याकेजिङ प्रयोग गर्नुपर्नेछ। यी मापदण्ड पालना नगरे असोज १५ गतेदेखि कारबाही गरिने वार्ड ६ को कार्यालयले यहाँ रहेका मासु व्यवसायीलाई भेला पारेर नै यसबारेमा कडा सचेत गराइसकेको वार्ड सदस्य कमल श्रेष्ठले जानकारी दिनुभयो ।
