काठमाडौँ , असोज ४ । पाकिस्तानको दक्षिण-पश्चिम बलुचिस्तान प्रान्तमा एक प्रमुख राजमार्गमा भएको सुरक्षा कारबाहीका क्रममा ५ जना लडाकु विद्रोही मारिएको सेनाले जनाएको छ । अपहरणमा परेका २३ जना सर्वसाधारणलाई सकुशल उद्धार गरिएको सेनाले जनाएको छ । सेनाको सञ्चार शाखा ‘इन्टर-सर्भिसेज पब्लिक रिलेसनल’ (आइएसपीआर) ले एक विज्ञप्ति जारी गर्दै यात्रुहरूको अपहरण, फिरौती असुली र सवारी साधनहरू नियन्त्रणमा लिने प्रयास लडाकुहरुले गरेको आरोप लगाएको छ ।’लडाकुहरूले गए राति (शुक्रवार) कालाल नजिकैको पाकिस्तान राजमार्ग (एन-२५ मा एउटा अवैध जाँचचौकी (चेकपोस्ट) स्थापना गर्ने प्रयास गरेपछि उक्त अपरेसन सुरु गरिएको थियो,’ सेनाले जारी गरेको विज्ञप्तिमा भनिएको छ ।
सुरक्षा फौजले तत्काल जवाफी कारबाही गरेको र सोही क्रममा भएको दोहोरो भिडन्तमा ५ लडाकु मारिएको सेनाले जनाएको छ।आइएसपीआरका अनुसार फौजले लडाकुको एक लुक्ने ठाउँमा छापा मारी २३ जना सर्वसाधारणलाई अपहरणमुक्त गरेको छ । यसक्रममा लडाकुहरूले नियन्त्रणमा लिएका ६ वटा ट्रक, ३ वटा बस र २ वटा कार पनि बरामद गरेको छ।यस कारबाहीका क्रममा ठूलो मात्रामा हतियार, गोलाबारूद र विस्फोटक पदार्थ पनि फेला परेको सेनाले जनाएको छ।सेनाले थप जानकारी भनेको छ,’यस रणनीतिक राष्ट्रिय राजमार्गमा यात्रा गर्ने नागरिकहरूको सुरक्षा सुनिश्चित गर्न र बाँकी रहेका लडाकुहरूलाई सखाप पार्न वरपरका क्षेत्रहरूमा खोजी तथा क्लियरेन्स अपरेसन अझै जारी छ।’
