काठमान्डौ,५ असोज। नेकपा (एमाले) अध्यक्ष केपी शर्मा ओलीले गत वर्षको भदौमा भएको ‘जेनजी’ आन्दोलनअघि युवाको मनोविज्ञान बुझ्न नसक्नु र सामाजिक सञ्जाल नियमनबारे स्पष्ट रूपमा बुझाउन नसक्नु सरकार तथा पार्टीको कमजोरी रहेको स्वीकार गरेका छन्।
पार्टीको केन्द्रीय कमिटी बैठकमा पेस गरिएको राजनीतिक प्रतिवेदनमा ओलीले सडकमा आएका सबै युवा हिंसात्मक नरहेको उल्लेख गर्दै युवामा बढेको निराशा, बेरोजगारी, शैक्षिक भविष्यको अन्योल, पारिवारिक ऋण र राज्यले आफ्ना कुरा नसुनेको अनुभूति समयमै सम्बोधन गर्न नसकिएको बताएका छन्।
उनले युवाको बेचैनीलाई राज्य र राजनीतिक दलका लागि आफ्नो शासनशैली, संवादशैली र जनसम्पर्क समीक्षा गर्ने ऐना का रूपमा व्याख्या गरेका छन्।
विशेषगरी सामाजिक सञ्जाल नियमनसम्बन्धी तत्कालीन सरकारको निर्णय जनतासामु स्पष्ट पार्न नसक्नु गम्भीर कमजोरी भएको ओलीको निष्कर्ष छ।
उनका अनुसार नागरिक स्वतन्त्रतासँग जोडिएको संवेदनशील विषयमा सरकारको भाषा स्पष्ट, विश्वसनीय र संवादमुखी बन्न नसक्दा सामाजिक सञ्जालमा भ्रम फैलाउने वातावरण बनेको थियो।
