दमक, ७ असोज । दमक नगरपालिका वडा नम्बर २ स्थित पाथीभरा कोलोनीमा बाल उद्यान सञ्चालनमा ल्याइएको छ। बालमैत्री नगर घोषणा गर्ने तयारी भइरहेका बेला बालबालिकाका लागि खेल्ने तथा मनोरञ्जन गर्ने खुला स्थानका रूपमा बाल उद्यान निर्माण गरिएको हो।
बालबालिकाका लागि विभिन्न खेल संरचना, युवाका लागि कसरत गर्ने साधन तथा ज्येष्ठ नागरिकका लागि बस्ने फलैँचासहितको संरचना निर्माण गरिएको छ।
बाल उद्यानको मंगलबार साँझ दमक नगरपालिकाका प्रमुख रामकुमार थापा, उपप्रमुख रेगिना भट्टराई प्रसाईं, वडा नम्बर २ का वडाध्यक्ष प्रजापति सापकोटा, वडा नम्बर १ का वडाध्यक्ष हरिप्रसाद न्यौपाने, वडा नम्बर ९ का वडाध्यक्ष कुबेर भट्टराई र नगरका प्रमुख प्रशासकीय अधिकृत कमल भट्टराईलगायतको उपस्थितिमा उद्घाटन गरिएको हो।
दमकका विभिन्न वडाहरू अहिले बालमैत्री वडा घोषणा भइरहेका छन्। बाँकी वडाहरू पनि बालमैत्री घोषणा भएपछि समग्र नगरलाई नै बालमैत्री नगरका रूपमा घोषणा गर्ने तयारी भइरहेको नगरपालिकाले जनाएको छ।
बालबालिकालाई घरभित्र मात्र सीमित नराखी बाहिर निस्किएर खेल्न तथा रमाउन सक्ने खुला स्थानका रूपमा विकास गर्ने उद्देश्यले नगरपालिकाको लगानीमा बाल उद्यान निर्माण गरिएको नगरप्रमुख रामकुमार थापाले बताउनु भयो।
करिब ४ कठ्ठा क्षेत्रफलमा फैलिएको बाल उद्यान अझै पूर्ण रूपमा तयार भइसकेको छैन। यहाँ बगैँचा तथा अन्य हरियालीसम्बन्धी काम गर्न बाँकी रहेको नगरपालिकाले जनाएको छ।
बाल उद्यान निर्माणका लागि दमक नगरपालिकाले ३४ लाख ८९ हजार ८७७ रुपैयाँ लगानी गरेको छ।
