काठमाडौं ,१० कार्तीक । नेपाल प्रिमियर लिग (एनपीएल) अन्तर्गतको आजको पहिलो खेलमा चितवन राइनोजले विराटनगर किङ्सलाई ८ रनले पराजित गरेको छ। चितवनले दिएको १५८ रनको लक्ष्य पछ्याएको विराटनगर १९.३ ओभरमा सबै विकेट गुमाउँदै १४९ रनमा समेटियो। यससँगै चितवनले ८ रनको जित निकालेको हो। १५.५ ओभरमा पाँच विकेट गुमाएर १३२ रनको बलियो अवस्थामा रहेको विराटनगर त्यसपछि धराशायी बनेको थियो।
विराटनगरका लागि इमरान शेखले सर्वाधिक ३९ रन बनाँउनु भएको थियो आन्द्रे रसलले ३३ रनको योगदान गर्नु भयो। तर, उहाँहरूको प्रयासले टोलीलाई जित दिलाउन सकेन। चितवनका कमलसिंह ऐरीले चार विकेट लिनु भयो भने रिजन ढकालले दुई विकेट झार्नु भयो। उहाँहरूको उत्कृष्ट बलिङसँगै चितवनले रोमाञ्चक जित निकालेको हो। यसअघि टस हारेर पहिले ब्याटिङ गरेको चितवनले निर्धारित २० ओभरमा तीन विकेट गुमाउँदै १५७ रन बनाएको थियो। चितवनका ओपनर ब्याटर डेविड मलानले अर्धशतक प्रहार गर्दै सर्वाधिक ७० रन बनाँउनु भयो। जारी संस्करणमा अर्धशतक प्रहार गर्ने मलान पहिलो खेलाडीसमेत बन्नु भएको छ।
त्यस्तै, रवि बोपरा ३२ रन र ड्यान माउस्ली २९ रनमा अविजित रहनु भयो। विराटनगरका चरिथ असलंका, आन्द्रे रसल र एन्जेलो म्याथ्युजले समान एक–एक विकेट लिनु भयो।यस जितसँगै चितवनले प्रतियोगितामा महत्त्वपूर्ण सफलता हासिल गरेको छ।एनपीएलअन्तर्गत मंगलबार साँझ ५ बजे हुने दोस्रो खेलमा जनकपुर बोल्ट्स र कर्णाली याक्सबीच प्रतिस्पर्धा हुनेछ।
