सवारी दुर्घटनामा चार जनाको मृत्यु

झापा । काठमाडौं, सिन्धुली, सिराहा र सुनसरीमा भएका छुट्टाछुट्टै सवारी दुर्घटनामा चार जनाको मृत्यु भएको छ भने तीन जना घाइते भएका छन् ।

काठमाडौंको पिङ्गलास्थानमा सोमबार साँझ बसको ठक्करबाट गम्भीर घाइते भएकी स्कुटर चालकको आज मंगलबार मृत्यु भएको छ । मृत्यु हुनेमा शान्तीनगर बस्ने दोलखाकी २५ वर्षीया कृतिका कार्की रहेकी छिन् । गौशालाबाट एयरपोर्टतर्फ तीव्र गतिमा जाँदै गरेको बा ५ ख १५३८ नम्बरको यात्रु बसले बाग्मती प्रदेश–०२–०२१ प १९३५ नम्बरको स्कुटरलाई हिजो साँझ सवा छ बजे ठक्कर दिएको थियो ।

सिनामंगल स्थित काठमाडौं मेडिकल कलेजमा उपचारको क्रममा आज बिहान ५ बजे कार्कीको मृत्यु भएको ट्राफिक प्रहरीले जनाएको छ । दुर्घटना पश्चात फरार रहेका बस चालकको खोजी भइरहेको छ । सिन्धुलीको दुधौली नगरपालिका–७ डम्बरखाडीमा सोमबार साँझ स्कुटर र मोटरसाइकल आपसमा ठोक्किँदा एक जनाको मृत्यु भएको छ भने तीन जना घाइते भएका छन् ।

कटारीबाट दुधौलीतर्फ जाँदै गरेको प्रदेश २–०१–००१ प ८१५४ नम्बरको स्कुटर र विपरित दिशाबाट आउँदै गरेको प्रदेश १–०१– ००१ प ५२०७ नम्बरको मोटरसाइकल हिजो साँझ छ बजे आपसमा ठोक्किँदा मोटरसाइकलमा पछाडी सवार दुधौली नगरपालिका–७ कत्ले खोलाका ५५ वर्षीय वीर बहादुर मगरको मृत्यु भएको हो । उपचारको लागि विराटनगर लैजाने क्रममा मगरको बाटोमै मृत्यु भएको हो ।

दुर्घटनामा घाइते भएकाहरूको विभिन्न अस्पतालमा उपचार भइरहेको छ । उनीहरूको अवस्था खतरामुक्त रहेको सिन्धुली प्रहरीले जनाएको छ । सिराहाको धनगढीमाई नगरपालिका–११ मा सोमबार साँझ सवारी साधनको ठक्करबाट मोटरसाइकल चालकको मृत्यु भएको छ ।

नम्बर नखुलेको सवारी साधनले स २ प ९९४४ नम्बरको मोटरसाइकललाई हिजो साँझ छ बजे ठक्कर दिँदा गम्भीर घाइते भएका मोटरसाइकल चालक सिराहाकै मिर्चैया नगरपालिका–७ का ३२ वर्षीय मोहमद समिनको उपचारका लागि अस्पताल लैजाने क्रममा बाटोमै मृत्यु भएको हो ।

मोटरसाइकललाई ठक्कर दिएर सवारी साधन सहित फरार भएका चालकको खोजी भइरहेको इलाका प्रहरी कार्यालय धनगढीमाईले जनाएको छ । यस्तै, सुनसरीको धरान उपमहानगरपालिका–१५ आरालाइनमा सोमबार साँझ ट्रकमा मोटरसाइकल ठोक्किँदा मोटरसाइकल चालकको मृत्यु भएको छ ।

मृत्यु हुनेमा भक्तपुर नगरपालिका २ का ४२ वर्षीय राजेश सिजापती रहेका छन् । सिजापतीले चलाएको बा ५८ प ८३२८ नम्बरको मोटरसाइकल सडक छेउमा रोकिराखेको ना ७ ख ११५८ नम्बरको ट्रकमा हिजो साँझ साढे ६ बजे ठोकिएको थियो ।

धरान स्थित विपी कोइराला स्वास्थ्य विज्ञान प्रतिष्ठानमा उपचारको क्रममा उनको हिजो बेलुकी सात बजे मृत्यु भएको इलाका प्रहरी कार्यालय धरानले जानकारी दिएको छ ।