दमक, २ भदौ । बालप्रतिभा गायन रियालिटी सो ‘भ्वाइस किड्स’ सिजन ३ को उपाधि नेपालीभाषी भुटानी अनुया तामाङले जित्नु भएको छ ।
काठमाडौंमा शनिबार साँझ आयोजित ग्राण्ड फिनालेमा कोच प्रमोद खरेलको टिमबाट प्रतिस्पर्धी तामाङले उपाधि उपाधि सहित १० लाख रुपैयाँ र प्रायोजकको तर्फबाट गिफ्ट ह्याम्पर प्राप्त गर्नुभयो । बुबाआमासँगै तेस्रो मुलुक पुनर्वासका क्रममा अमेरिकामा बस्दै आउनु भएकी अनुसा प्रतियोगिताका लागि नेपाल आउनु भएको थियो ।
अन्य फाइनलिस्टलाई पनि गिफ्ट ह्याम्पर प्रदान गरिएको छ । प्रतियोगिताको प्रायोजकमा वात्साल्य न्याचुरल आइभीएफ थियो ।
विजेतालाई हिमालय टिभीका अध्यक्ष धर्मराज भुसाल, कार्यकारी निर्देशक श्याम कँडेल लगायतले पुरस्कार प्रदान गर्नुभयो ।
कोच प्रमोद खरेलको टिमबाट अनुया र लाक्पा शेर्पा, कोच मिलन नेवारको टिमबाट समीक्षा धिताल र रिञ्जिन डोल्मा लामा फाइनलिस्ट हुनुभएको थियो । कोच छेवाङ लामाको टिमबाट द्वितिका प्रधान र छेसाङ तामाङ, कोच मेलिना राईको टिमबाट सिमला धिताल र आयुष लामाले फिनालेमा प्रतिस्पर्धा गर्नुभयो । दर्शकले दिएको भोटको आधारमा बढी भोट प्राप्त गर्ने प्रतिस्पर्धीलाई विजेता चुनिएको हो ।
फिनालेमा कोच र तिनका प्रतिस्पर्धीले सांगीतिक प्रस्तुति दिएका थिए । फिनालेमा ‘भ्वाइस अफ नेपाल’को छैटौं सिजनको डिजिटल अडिसन बाँकी ७ दिन मात्र खुला रहने जानकारी दिइएको थियो ।
