दमक, ९ असोज ।
विज्ञान प्रविधिले धेरै असुरक्षा दिन थालेको विषयमा विश्व चिन्ताग्रस्त बन्दै गइरहेको छ । विज्ञानको त्यस्तै प्रविधिमध्ये लेवनानमा पेजर विष्फोटले विश्वलाई सूचना प्रविधिको माध्यमबाट आतंकति बनाइरहेको छ ।
यस सन्दर्भमा प्रविधिसँग नजिक रहेर त्यसबारेको समेत विश्लेषण गर्दै आउनु भएका नेकपा एमालेका केन्द्रीय सदस्य गोविन्द थापाले त्यसलाई राजनीतिसँग जोडेर यसबाट विश्व आतंकित बनाउन सक्नेतर्फ सचेत रहन आफ्नो ‘भ्लग’मा उल्लेख गर्नुभएको छ । सो सामग्री उहाँले ‘उज्यालो खबर’लाई समेत प्रदान गर्नु भएको छ ।
‘लेवनानमा भएको पेजर आक्रमण सामान्य होइन, नेपालसम्मलाई यसले प्रभाव पार्दै जाने खतरा बढेको छ ।’– उहाँले भन्नुभयो । भ्वाइसकल गर्न नमिल्ने तर म्यासेजमात्र गर्न पाइने प्रविधि हो पेजर । सुरक्षित मानेर लेननानमा हिजबुल्ला समूहले आफ्ना सदस्यलाई पेजर बाँढेको अवस्था थियो । फोन चलाउँदा इजराययले त्यो ट्रयाक गर्न सक्छ भनेर सुरक्षित मानेर पेजर सञ्चालन भएको अवस्थामा त्यहाँ हिजबुल्लासहित हजारौं मानिसले बोकेको पेजर एकैचोटी विष्फोट गराइएर रहस्यमय आतंक सिर्जना भएको छ ।
युद्ध गर्ने तरिका फेरिदै गएको छ । सूचना प्रविधिको माध्यमबाट भौतिक रुपमै आक्रमण गर्न सकिने अवस्थाले युद्ध र हिंसाको विश्व नयाँ युगमा प्रवेश गरेको थापाको ठहर छ ।
