दमक, असोज १२
तीन दिनदेखि निरन्तर भएको वर्षाका कारण झापाका नदी र खोलाको तटीय क्षेत्रमा जोखिम कायमै छ । बाढीमा बगेका तीन जना अझै नभेटिएको झापाका प्रमुख जिल्ला अधिकारी बन्धुप्रसाद बास्कोटाले बताउनु भयो ।
उहाँले उज्यालो खवरसँग कुरा गर्दै भन्नु भयो ‘अहिले तटीय क्षेत्रमा जोखिम उस्तै छ । कहीँ कहीँ पानीको सहत घट्न थालेको छ भने कँही घटेको छैन । हामीले निरन्तर सुरक्षित ठाउँमा बस्न अनुरोध गरिरहेका छौ ।’
उहाँका अनुसार झापामा अहिलेसम्म बाढीका कारण तीनजना वेपत्ताकै अवस्थामा रहेका छन् ।
२४० परिवारलाई सुरक्षीत स्थानमा सारियो
बाढीका कारण विस्थापित भएका २४० घर परिवारलाई सुरक्षित स्थानमा सारिएको छ ।
बिरिङ खोलाको बाढी पसी झापा गाउँपालिका-६ भन्द्रबस्तीका ५० घर, भद्रपुर-३ स्थित नयाँ बस्तीमा ३० घर, बाह्रदशी गाउँपालिका-२ स्थित सुकुम्वासी बस्तीमा २४ घर परिवार विस्थापित भएका छन् । भद्रपुर-५ गैरीगाँउमा मेची खोला पस्दा २० घर, शिवसताक्षी नगरपालिका-१० बिहानी टोलमा कनकाई नदीले कटान सुरु गर्दा १५ घरमध्ये ६ घर अति जोखिम रहेकोले मुक्तिघाटको भवनमा स्थानान्तरण गरिएको जनाइएको छ ।
शिवसताक्षी-७ मा एक घरपरिवारलाई पनि सुरक्षित स्थानमा सारिएको छ ।
बिर्तामोड-५ र बिर्तामोड-४ मा ७ घर परिवार विस्थापित भएका छन् । बिर्तामोड-८ बाह्रबिघेमा ३ घर विस्थापित भएको जिल्ला प्रहरी कार्यालय झापाले जनाएको छ ।
यता, कनकाई नगरपालिका ३ झर्ना बस्तीमा शन्का खोला र सुरुंगा खोलाको पानी पस्दा ११ घर ,बिर्तामोड-३ सिर्जना टोलमा अदुवा खोलाको पानी पस्दा ९ घरपरिवार विस्थापित छन् । हल्दिबारी गाउँपालिका-२ खर्साङचोकमा १३ घरपरिवार, भद्रपुर-६ डाँगडोरा खोलाको पानी पस्दा दुई घर, झापा गाउँपालिका-६ मा बिरिङ खोलाको बाढी पस्दा तीन घर परिवार पनि उसैगरी विस्थापित भए ।
साथै गौरीगञ्ज गाउँपालिका-१ बाङ्गे टोलमा कमल खोला पस्दा १२ घर भद्रपुर-४ मेची गाउँमा डुबानले ६ घर, कचनकवल गाउँपालिका-७ भट्टा टोलमा डुबान हुँदा १५ घरपरिवार विस्थापित भएपछि उनीहरुलाई नजिकैका सुरक्षित स्थानमा सारिएको छ ।
सबैलाई अहिले प्राथमिक आवश्यकताहरु स्थानीय वडा कार्यालयहरुले पुरा गरिरहेको प्रमुख जिल्ला अधिकारी बास्कोटाको भनाई छ ।
अन्य आवश्यकीय सामग्री चाहिएमा जिल्लाको विपद् व्यवस्थान समिति पनि तयारी अवस्थामा रहेको उहाँले जानकारी दिनुभयो ।
